കാർഷിക സമൃദ്ധി തിരിച്ചു പിടിക്കാൻ പൂർവ്വ വിദ്യാർഥി കൂട്ടായ്മയായ നിറവ് ’90 ന്റെ നേതൃത്വത്തിൽ നെൽകൃഷി ആരംഭിച്ചു

അവനവഞ്ചേരി ഗവ. ഹൈസ്കൂളിലെ 1990 എസ്.എസ്.എൽ.സി. ബാച്ചിലെ പൂർവ്വ വിദ്യാർഥികളുടെ കൂട്ടായ്മയായ നിറവ് ’90 ന്റെ നേതൃത്വത്തിൽ ഇടയ്ക്കോട് ഏലായിൽ നെൽകൃഷി ആരംഭിച്ചു. കഴിഞ്ഞ വർഷം നടത്തിയ നെൽകൃഷി വൻ വിജയമായിരുന്നു. അതിൽ നിന്ന് പ്രചോദനം ഉൾക്കൊണ്ട് ഇത്തവണ തരിശുകിടന്ന രണ്ടേക്കർ സ്ഥലത്താണ് നിറവിന്റെ നേതൃത്വത്തിൽ ഞാറുനട്ടത്. ഉമ ഇനത്തിൽപ്പെട്ട നെൽ വിത്താണ് കൃഷിക്കുപയോഗിച്ചത്. സഹപാഠികൾക്ക് സഹായമെത്തിച്ചും പഠിച്ച വിദ്യാലയത്തിന്റെ വികസന പ്രവർത്തനങ്ങളിൽ നേതൃത്വം നൽകിയും പ്രവർത്തിക്കുന്ന നിറവിന്റെ സാമൂഹ്യ പ്രതിബദ്ധതാ പ്രവർത്തനത്തിന്റെ ഭാഗമായാണ് ഇന്ന് അന്യം നിന്നു പോകുന്ന നെൽകൃഷി വ്യാപിപ്പിക്കുന്നതിന് ഇത്തരം പ്രവർത്തനം ഏറ്റെടുത്തത്. ഞാറു നടീലിന്റെ ഉദ്ഘാടനം അവനവഞ്ചേരി ഹൈസ്കൂൾ മുൻ അധ്യാപകനായ അബ്ദുൾ സത്താർ ഞാറ്കെട്ട് കൈമാറിക്കൊണ്ട് നിർവ്വഹിച്ചു. നിറവ് ’90 പ്രവർത്തകരായ എ. അൻഫാർ, എൻ. സാബു, എസ്.സന്തോഷ്കുമാർ, എസ്.എസ്.ഷിബു, വിക്ടർ, ബിനുദേവ്, ജയരാജ്, ഷീബ, ജിസ അനിൽ, എം.ആർ. ലേഖ, സ്വപ്ന മോഹൻ, ഗീതാ റാണി, ശോഭ, എസ്.ആർ. ബിന്ദു, ദീപ, ബീന എന്നിവർ സംബന്ധിച്ചു.