ആലപ്പുഴ: എസ്എന്ഡിപി കണിച്ചുകുളങ്ങര യൂണിയന് സെക്രട്ടറി ആയിരുന്ന കെ കെ മഹേശന്റെ ആത്മഹത്യയില് എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന് പ്രതിയാകും. വെള്ളാപ്പള്ളി നടേശന്, മകന് തുഷാര് വെള്ളാപ്പള്ളി, കെ എല് അശോകന് എന്നിവരെ പ്രതിചേര്ത്ത് കേസെടുക്കാന് കോടതി ഉത്തരവിട്ടു.
കെ കെ മഹേശന്റെ ഭാര്യ നല്കിയ ഹര്ജിയിലാണ് ആലപ്പുഴ ഒന്നാം ക്ലാസ് മജിസ്ട്രേറ്റ് കോടതി രണ്ടിന്റെ ഉത്തരവ്. മാനസിക പീഡനവും കള്ളക്കേസില് കുടുക്കിയതു മൂലവുമാണ് കെ കെ മഹേശന് ആത്മഹത്യ ചെയ്തത് എന്നാണ് ഭാര്യയുടെ വാദം. വെള്ളാപ്പള്ളി നടേശന്, തുഷാര് വെള്ളാപ്പള്ളി, കെ എല് അശോകന് എന്നിവരാണ് ഇതിന് കാരണമെന്നും ഹര്ജിയില് ആരോപിക്കുന്നു. ഇവരെ പ്രതിചേര്ത്ത് കേസെടുക്കണമെന്നാണ് ഹര്ജിയിലെ ആവശ്യം. നേരത്തെ ഈ ആവശ്യം മജിസ്ട്രേറ്റ് കോടതി തള്ളിയിരുന്നു. തുടര്ന്ന് കെ കെ മഹേശന്റെ ഭാര്യ ഹൈക്കോടതിയെ സമീപിച്ചു. സിആര്പിസി 154 പ്രകാരം കേസെടുക്കേണ്ട സംഭവമാണിതെന്നും അതിനാല് മജിസ്ട്രേറ്റ് കോടതി വീണ്ടും വാദം കേള്ക്കണമെന്നും ഹൈക്കോടതി നിര്ദേശിച്ചു. ഇതിന്റെ അടിസ്ഥാനത്തില് വാദം കേട്ട ശേഷമാണ് ആലപ്പുഴ കോടതിയുടെ ഉത്തരവ്.
