അഹമ്മദാബാദ്: സ്വന്തം തട്ടകത്തില് കൊല്ക്കത്ത നൈറ്റ്റൈഡേഴ്സിന് മുന്നില് കൂറ്റന് ലക്ഷ്യം വച്ച് ഗുജറാത്ത് ടൈറ്റന്സ്. ഐപിഎല്ലില് കൊല്ക്കത്തയ്ക്കെതിരെ നിശ്ചിത ഓവറില് നാല് വിക്കറ്റ് നഷ്ടത്തില് 204 റണ്സ് അടിച്ചെടുത്ത് ഗുജറാത്ത്. ഹര്ദിക് പാണ്ഡ്യയുടെ അഭാവത്തില് റാഷിദ് ഖാനാണ് ഗുജറാത്തിനെ നയിക്കുന്നത്. ടോസ് നേടി ഗുജറാത്ത് ബാറ്റിങ് തിരഞ്ഞെടുത്തു. തുടക്കത്തില് മെല്ലെ പോയ അവര് 11 ഓവറിന് ശേഷമാണ് കൂടുതല് ആക്രമണത്തിലേക്ക് കടന്നത്.
24 പന്തില് അഞ്ച് സിക്സും നാല് ഫോറും സഹിതം 63 റണ്സ് അടിച്ചെടുത്ത വിജയ് ശങ്കറിന്റെ ബാറ്റിങാണ് സ്കോര് 200 കടത്തിയത്. താരം പുറത്താകാതെ നിന്നു. ഡേവിഡ് മില്ലര് രണ്ട് റണ്സെടുത്ത് ക്രീസില് തുടര്ന്നു. സായ് സുദര്ശന് 38 പന്തില് രണ്ട് സിക്സും മൂന്ന് ഫോറും സഹിതം 53 റണ്സെടുത്തു. ഓപ്പണര് ശുഭ്മാന് ഗില് 31 പന്തില് അഞ്ച് ഫോറുകള് സഹിതം 39 റണ്സെടുത്തു. വൃദ്ധിമാന് സാഹ (17), അഭിനവ് മനോഹര് (14) എന്നിവരാണ് പുറത്തായ മറ്റ് താരങ്ങള്. കൊല്ക്കത്തയ്ക്കായി സുനില് നരെയ്ന് മൂന്ന് വിക്കറ്റുകള് വീഴ്ത്തി. സുയഷ് ശര്മ ഒരു വിക്കറ്റെടുത്തു.
