രാജകീയം റോയല്‍സ്; സിക്‌സടിച്ച് കോഹ്‌ലിയുടെ സെഞ്ച്വറി; ഹൈദരബാദിനെതിരെ സൂപ്പര്‍ വിജയം

ഹൈദരബാദിനെതിരെ രാജകീയവിജയവുമായി റോയല്‍ ചാലഞ്ചേഴ്‌സ് ബാംഗ്ലൂര്‍. വീരാട് കോഹ് ലിയുടെ തകര്‍പ്പന്‍ സെഞ്ച്വറിയാണ് ബാംഗ്ലൂരിന് സൂപ്പര്‍വിജയം സമ്മാനിച്ചത്. 94 റണ്‍സുമായി ക്രീസില്‍ നില്‍ക്കെ സിക്‌സര്‍ പറത്തിയാണ് വീരാട് സെഞ്ച്വറിയടിച്ചത്. 167 റണ്‍സ് എടുത്ത ശേഷമാണ് ഓപ്പണിങ് സഖ്യം തകര്‍ക്കാന്‍ ഹൈദരബാദിന് കഴിഞ്ഞത്.

63 ബോളില്‍ നിന്നാണ് കോഹ് ലി സെഞ്ച്വറി അടിച്ചത്. ഇതില്‍ നാല് സിക്‌സറുകളും 12 ഫോറുകളും ഉള്‍പ്പെടുന്നു. ഡുപ്ലെസ് 71 റണ്‍സ് നേടി പുറത്തായി. മാക്‌സ് വെല്‍ 9 റണ്‍സ് നേടി. ഭുവനേശ്വര്‍ കുമാറാണ് കോഹ്ലിയെ മടക്കിയത്.

ഹെന്റിച്ച് ക്ലാസന്റെ തകര്‍പ്പന്‍ സെഞ്ചറിയാണ് ഹൈദരബാദിന് പൊരുതാനുള്ള സ്‌കോര്‍ സമ്മാനിച്ചത്. ടോസ് ലഭിച്ച ബാംഗ്ലൂര്‍ ഹൈദരബാദിനെ ബാറ്റിങിന് അയക്കുകയായിരുന്നു. നിശ്ചിത ഓവറില്‍ അഞ്ചു വിക്കറ്റ് നഷ്ടത്തില്‍ 186 റണ്‍സെടുത്തു. 51 പന്തില്‍ ആറു സിക്സറുകളുടെയും 8 ഫോറുകളുടെയും അകമ്പടിയോടെ 104 റണ്‍സെടുത്ത് ക്ലാസനാണ് ഹൈദരാബാദിന്റെ ടോപ് സ്‌കോറര്‍.

ഓപ്പണര്‍മാരായ അഭിഷേക് ശര്‍മ(11), രാഹുല്‍ ത്രിപാഠി(15) മൂന്നാമനായി ഇറങ്ങിയ ക്യാപ്റ്റന്‍ എയ്ഡന്‍ മാര്‍ക്രം(18) എന്നിവര്‍ രണ്ടക്കം പിന്നിട്ടതിനു പിന്നാലെ ക്രീസ് വിട്ടപ്പോള്‍ ക്ലാസനാണ് ഹൈദരാബാദിന്റെ രക്ഷയ്ക്കെത്തിയത്. മൂന്നാം വിക്കറ്റില്‍ മാര്‍ക്രവുമായി 76 റണ്‍സിന്റെയും നാലാം വിക്കറ്റില്‍ ഹാരി ബ്രൂക്കു( 27)മായി 74 റണ്‍സിന്റെ കൂട്ടുകെട്ടുമാണ് ക്ലാസെന്‍ നേടിയത്. ബാംഗ്ലൂരിനായി മിച്ചല്‍ ബ്രയ്സ്വെല്‍ രണ്ടു വിക്കറ്റും മുഹമ്മദ് സിറാജ്, ഷഹ്ബാസ് അഹമ്മദ്, ഹര്‍ഷല്‍ പട്ടേല്‍ എന്നിവര്‍ ഒരോ വിക്കറ്റു വീതവും വീഴ്ത്തി.