പത്തനംതിട്ട: ആലപ്പുഴയിൽ പുന്നമടക്കായലിൽ ചരിത്രവിജയം നേടി സ്വന്തമാക്കിയ നെഹ്റുട്രോഫിയുമായി വിജയികൾ സന്നിധാനത്ത്. പള്ളാത്തുരുത്തി ബോട്ട് ക്ലബ്ബ്-വീയപുരംചുണ്ടൻ പ്രതിനിധികളാണ് നെഹ്റുട്രോഫിയുമായി ശബരിമലയിൽ എത്തിയത്. ക്ലബ്ബ് ഭാരവാഹകളുടെയും ചുണ്ടൻ ഭാരവാഹികളുടെയും നേർച്ചയുടെ ഭാഗമായാണ് കപ്പും കൊണ്ട് മല കയറിയത്.
ചുണ്ടന്റെ ഭാരവാഹികളായ രാജീവ്, രതീഷ്, പള്ളാത്തുരുത്തി ബോട്ട് ക്ലബ്ബിനെ പ്രതിനിധീകരിച്ച് രാഹുൽ രമേഷ് എന്നിവരാണ് ശബരിമലയിൽ എത്തിയത്. ചൊവ്വാഴ്ച രാത്രിയോടെയാണ് സംഘം മലകയറിയത്. തന്ത്രിയെ നേരിൽ കണ്ട് അനുഗ്രഹം വാങ്ങിയാണ് സംഘം മടങ്ങിയത്. ശബരിമലയ്ക്ക് പുറമേ മൂകാംബിക, തിരുപ്പതി, മൃംദംഗശൈലേശ്വരി ക്ഷേത്രം എന്നിവിടങ്ങളിലായി ക്ലബ്ബ് ഭാരവാഹികൾ കപ്പുമായി ദർശനം നടത്തും.
