ആറ്റിങ്ങൽ: ആലംകോട് വീണ്ടും യൂത്ത് കോൺഗ്രസ്, ഡി വൈ എഫ് ഐ സംഘർഷം. നിരവധി പ്രവർത്തകരുടെ വീടുകൾക്ക് നേരെ ആക്രമണം നടന്നു. രാത്രി ഒമ്പതര മണിയോടെയായിരുന്നു സംഭവം. കഴിഞ്ഞദിവസം രാത്രി മുഖ്യമന്ത്രിയുടെ വാഹനം കടന്നുപോകുന്ന സമയത്ത് യൂത്ത് കോൺഗ്രസ് പ്രവർത്തകർ കരിങ്കൊടി കാട്ടിയതുമായി ബന്ധപ്പെട്ട് സംഘർഷം നടന്നിരുന്നു. ഇതിൽ മൂന്നോളം ഡിവൈഎഫ്ഐ പ്രവർത്തകർക്ക് പരിക്കേറ്റിരുന്നു. ഇതിനെ തുടർന്ന് യൂത്ത് കോൺഗ്രസ് നേതാവ് ആലംകോട് സുഹൈലിന്റെ വീടിനു നേരെ ആക്രമണം ഉണ്ടാകുമെന്ന സംശയത്തെ തുടർന്ന് പോലീസ് ക്യാമ്പ് ചെയ്യുകയായിരുന്നു.
രാത്രിയോടെ പോലീസ് മാറിയ സമയത്താണ് സുഹൈലിന്റെ വീടിനു നേരെ ആക്രമണമുണ്ടായത്. തുടർന്ന് സംഘടിച്ച് എത്തിയ യൂത്ത് കോൺഗ്രസ് പ്രവർത്തകർ ആറ്റിങ്ങൽ നഗരസഭ അംഗം നജാമിന്റെ വീടിനു നേരെ ആക്രമണം അഴിച്ചുവിടുകയായിരുന്നു. ആറ്റിങ്ങൽ ആലംകോട് ഡിവൈഎഫ്ഐ യൂത്ത് കോൺഗ്രസ് പ്രവർത്തകർ തമ്മിൽ കഴിഞ്ഞ ദിവസം രാത്രിയിൽ ഉണ്ടായ സംഘർഷത്തെത്തുടർന്ന് കരവാരം ഗ്രാമപഞ്ചായത്തിലും ആലംകോട് ടൗണിലും കോൺഗ്രസ് ഇന്ന് ഹർത്താൽ ആചരിക്കുന്നു.
