കൊല്ലം: അഞ്ചലിൽ മുള്ളന്പന്നിയെ ജീപ്പ് ഇടിച്ച് കൊന്ന ശേഷം ഇറച്ചിയാക്കിയ ആയുർവേദ ഡോക്ടര് അറസ്റ്റില്. വാളകം അമ്പലക്കര സ്വദേശി ബാജിയാണ് പിടിയിലായത്. കഴിഞ്ഞ ദിവസം രാവിലെ മാർക്കറ്റിൽ വെറ്റില വില്ക്കാനായി എത്തിയതായിരുന്നു ബാജി. വാളകത്തെ സ്വകാര്യ ആശുപത്രിക്ക് സമീപമെത്തിയപ്പോൾ പാതയോരത്ത് കണ്ട മുള്ളന്പന്നിയെ ജീപ്പ് ഉപയോഗിച്ച് ഇടിച്ചു കൊന്നു. പിന്നാലെ ഇതേ വാഹനത്തില് കടത്തികൊണ്ടുപോയി ഇറച്ചിയാക്കിയെന്നാണ് പരാതി.
നാട്ടുകാർ ദൃശ്യങ്ങള് സഹിതം വനംവകുപ്പിന് കൈമാറിയതോടെ അഞ്ചല് റേഞ്ച് ഫോറസ്റ്റ് ഓഫീസർ ബാജിയുടെ വീട്ടില് നടത്തിയ പരിശോധനയില് മുള്ളന്പന്നിയുടെ ഇറച്ചി കണ്ടെത്തി. പിന്നാലെയാണ് അറസ്റ്റ്. മുള്ളന്പന്നിയെ കടത്തിയ ജീപ്പും വനംവകുപ്പ് കസ്റ്റഡിയില് എടുത്തു. പ്രതിയെ പുനലൂര് വനം കോടതിയില് ഹാജരാക്കി റിമാൻഡ് ചെയ്തു.
