കൊൽക്കത്തയിലെ ഹൂഗ്ലി നദിക്കടിയിലൂടെ ഇന്ന് മെട്രോ സഞ്ചരിക്കുമ്പോൾ ഇന്ത്യയ്ക്ക് അത് അഭിമാന നിമിഷമാണ്. രാജ്യത്തെ ആദ്യ അണ്ടർ വാട്ടർ മെട്രോ ടണൽ ആണ് പശ്ചിമ ബംഗാളിലെ കൊൽക്കത്തയ്ക്കും ഹൗറയ്ക്കും ഇടയിൽ യാഥാർഥ്യമായിരിക്കുന്നത്.
കൊൽക്കത്ത – ഹൗറ അണ്ടർ വാട്ടർ റെയിൽവേ ലൈൻ നൂറു വർഷങ്ങൾക്ക് മുൻപാണ് മുൻപോട്ടുവെച്ചത്. കൃത്യമായി പറഞ്ഞാൽ 1921ൽ. ഇന്ത്യയിൽ ജനിച്ച ബ്രിട്ടീഷ് എൻജിനീയറായ സർ ഹാർളി ഡൽറിംപിൾ ആണ് 1921ൽ കൊൽക്കത്തയിലൊരു അണ്ടർ വാട്ടർ റെയിൽവേ പാത എന്ന ആശയം മുൻപോട്ടുവെച്ചത്. വർഷം 100 പിന്നിട്ടെങ്കിലും ഒടുവിൽ അത് യാഥാർഥ്യമായതിൽ ഇന്ത്യയ്ക്ക് അഭിമാനിക്കാം.
കിഴക്കൽ കൊൽക്കത്തയിലെ സെക്ടർ വിയും സെൽദ റെയിൽവേ സ്റ്റേഷനും തമ്മിൽ ബന്ധിപ്പിക്കുന്ന കൊൽക്കത്ത മെട്രോയുടെ 9.2 കിലോമീറ്റർ ദൈർഘ്യമുള്ള ഗ്രീൽ ലൈനിലാണ് അണ്ടർ വാട്ടർ മെട്രോ ടണൽ ഉള്ളത്. ഗ്രീൽ ലൈനിലെ 4.8 കിലോമീറ്റർ നീളുന്ന ഹൗറ മൈതാൻ മുതൽ എസ്പ്ലനേഡ് വരെയുള്ള സ്ട്രെച്ചിലെ 520 മീറ്റർ നീളമുള്ള ടണൽ ആണ് ഹൂഗ്ലി നദിക്കടിയിലൂടെ കടന്നുപോകുന്നത്. തികച്ചും എഞ്ചിനീയറിങ് വിസ്മയം. നദിക്കടിയിൽ 13 മീറ്റർ ആഴത്തിലാണ് പാത, ഭൂപ്രതലത്തിൽനിന്ന് 37 മീറ്ററും. പ്രധാനമന്ത്രി നരേന്ദ്ര മോദി ഇന്ന് പദ്ധതി നാടിന് സമർപ്പിക്കും.
അണ്ടർ വാട്ടർ മെട്രോ ടണലിൻ്റെ പ്രത്യേകതകൾ
ഹൂഗ്ലി നദിയുടെ പടിഞ്ഞാറൻ തീരമായ ഹൗറ, കിഴക്കൻ തീരമായ സാൾട്ട് ലേക്ക് സിറ്റി എന്നീ സ്റ്റേഷനുകൾക്ക് ഇടയിലുള്ള പാതയിലാണ് അണ്ടർ വാട്ടർ ടണൽ.
ഹൗറ മൈതാൻ – എസ്പ്ലനേഡ് സ്ട്രെച്ചിലാണ് അണ്ടർ വാട്ടർ മെട്രോ ടണൽ സ്ഥിതിചെയ്യുന്നത്.
ഹൂഗ്ലി നദിക്കടിയിലാണ് ടണൽ നിർമിച്ചിരിക്കുന്നത്.
ഹൗറ – സാൾട്ട് ലേക്ക് സിറ്റി സ്റ്റേഷനുകൾക്കിടയിൽ ആറ് സ്റ്റേഷനുകളാണ് ഉള്ളത്. അതിൽ മൂന്നെണ്ണം ഭൂമിക്കടിയിലാണ്.
പാതയുടെ 10.8 കിലോമീറ്ററാണ് ഭൂമിക്കടിയിലുള്ളത്.
ഇന്ത്യയിൽ ഏറ്റവും ആഴത്തിൽ സ്ഥിതിചെയ്യുന്ന മെട്രോ സ്റ്റേഷനായി ഹൗറ സ്റ്റേഷൻ മാറും.
45 സെക്കൻഡ് കൊണ്ട് മെട്രോയ്ക്ക് 520 മീറ്റർ നീളുമുള്ള അണ്ടർ വാട്ടർ ടണൽ പിന്നിടാം.
കൊൽക്കത്ത മെട്രോ റെയിൽ കോർപറേഷൻ ലിമിറ്റഡ് ആണ് നിർവഹണ ഏജൻസി.
പാത ഗതാഗതയോഗ്യമാകുന്നതോടെ കൊൽക്കത്ത നഗരത്തിലെ ഗതാഗതക്കുരുക്ക് ഒരുപരിധിവരെ കുറയുമെന്ന് പ്രതീക്ഷ
