അഹമ്മദാബാദ്: 242 യാത്രക്കാരുമായി ലണ്ടനിലേക്ക് പോയ എയര് ഇന്ത്യ വിമാനം തകര്ന്നുവീണു. അഹമ്മദാബാദ് വിമാനത്താവളത്തിന് സമീപം പറന്നുയര്ന്നതിന് തൊട്ടുപിന്നാലെയാണ് അപകടം ഉണ്ടായത്. ഇന്ന് ഉച്ചയ്ക്ക് അഹമ്മദാബാദിലെ സര്ദാര് വല്ലഭായ് പട്ടേല് രാജ്യാന്തര വിമാനത്താവളത്തില്നിന്നു ടേക് ഓഫ് ചെയ്ത് നിമിഷങ്ങള്ക്കുള്ളിലാണ് അപകടം. എയര് ഇന്ത്യ 171 ഡ്രീം ലൈനര് വിമാനമാണ് തകര്ന്നത്.
വിമാനത്തിന്റെ പിന്വശം മരത്തിലിടിച്ചെന്നാണ് സൂചന. വിമാനത്തിന്റെ ഒരു ചിറക് ഒടിഞ്ഞതായാണ് ചിത്രങ്ങളില്നിന്നു വ്യക്തമാകുന്നത്. ജനവാസ മേഖലയിലാണ് വിമാനം തകര്ന്നുവീണത്. ഇതേതുടര്ന്ന് പ്രദേശത്തെ റോഡുകള് അടച്ചു.
തകര്ന്നതിനു പിന്നാലെ വിമാനത്തില് തീപിടിച്ചു. പ്രദേശമാകെ പുക നിറഞ്ഞിരിക്കുകയാണ്. അഹമ്മദാബാദ് ഫയര് ആന്ഡ് എമര്ജന്സി സര്വീസസിന്റെ നേതൃത്വത്തില് രക്ഷാപ്രവര്ത്തനം പുരോഗമിക്കുന്നു. ആളപായം സംബന്ധിച്ച വിവരങ്ങള് ഇതുവരെ പുറത്തുവന്നിട്ടില്ല.
