കൊച്ചി: ഓണം ബംപറിന്റെ ഒന്നാം സമ്മാനമായ 25 കോടി രൂപ നേടിയത് എറണാകുളം നെട്ടൂര് സ്വദേശി തന്നെയെന്ന് റിപ്പോര്ട്ടുകള്. ലോട്ടറി വിറ്റ ഏജന്സി ഉടമയാണ് ഇത് സംബന്ധിച്ച സൂചനകള് നല്കിയത്. എന്നാല് സമ്മാന ജേതാവ് ഇപ്പോള് പേര് വെളിപ്പെടുത്താന് ആഗ്രഹിക്കുന്നില്ലെന്നും ലോട്ടറി വിറ്റ ഏജന്റ് ലതീഷ് പറയുന്നു.
സ്ഥിരമായി ടിക്കറ്റ് എടുക്കുന്ന വ്യക്തിയല്ല, ഓണം ബംപര് സ്പെഷ്യല് ആയി എടുത്ത ടിക്കറ്റിനാണ് സമ്മാനം ലഭിച്ചത്. അദ്ദേഹം നെട്ടൂര് സ്വദേശി തന്നെയാണ്. താന് ടിക്കറ്റ് കണ്ടിട്ടില്ല, തന്റെ ഒരു സുഹൃത്തിനെയാണ് ടിക്കറ്റ് കാണിച്ചത് എന്നും ലതീഷ് പറയുന്നു.
ഭഗവതി ലോട്ടറി ഏജന്സിയുടെ വൈറ്റിലയിലെ ഏജന്സിയില് നിന്നും ഏജന്റ് ലെതീഷ് എടുത്ത് വിറ്റ ടിക്കറ്റിനായിരുന്നു ഒന്നാം സമ്മാനം ലഭിച്ചത്. പാലക്കാട് ലോട്ടറി ഓഫിസില് നിന്നാണ് ഏജന്സി ലോട്ടറിയെടുത്തത്. നെട്ടൂരില് ടിക്കറ്റ് വില്പ്പന നടത്തുന്ന ആളാണ് ലെതീഷ്. ഏജന്സിക്ക് രണ്ട് കോടി രൂപ കമ്മീഷനായി ലഭിക്കും.
വാര്ത്തകള് പുറത്തുവന്നതോടെ ബംപര് നെട്ടൂരുകാര്ക്കു തന്നെ അടിക്കണമെന്നാണ് ആഗ്രഹം എന്ന് ലതീഷ് മാധ്യമങ്ങളോട് പറഞ്ഞിരുന്നു. ഒരു മാസം മുന്പായിരുന്നു ലതീഷ് ലോട്ടറി കച്ചവടം ആരംഭിച്ചുത്. പിന്നീടുള്ള ദിവസങ്ങളില് ടിക്കറ്റ് തീരാതെയിരിക്കുമ്പോള് തന്നെ സഹായിക്കാനായി ടിക്കറ്റ് എടുക്കുന്നവരാണ് നെട്ടൂരുകാര്. സമ്മാനം തന്റെ മാത്രമല്ല, ടിക്കറ്റ് എടുക്കുന്നവരുടെ കൂടി ഭാഗ്യമാണെന്നും ലതീഷ് പറഞ്ഞിരുന്നു.
