കൊച്ചി: ഒന്നരലക്ഷം രൂപ കൈക്കൂലി ആവശ്യപ്പെട്ട കേസില് കെഎസ്ഇബി അസിസ്റ്റന്റ് എന്ജിനീയര് വിജിലന്സിന്റെ പിടിയില്. തേവര ഇലക്ടിക്കല് സെക്ഷന് ഓഫീസ് അസിസ്റ്റന്റ് എന്ജിനീയര് പാലാരിവട്ടം സ്വദേശി എന്. പ്രദീപനാണ് പിടിയിലായത്. വൈദ്യുതി കണക്ഷന് സ്ഥിരപ്പെടുത്താന് വേണ്ടിയാണ് കെഎസ്ഇബി അസിസ്റ്റന്റ് എന്ജിനീയര് പണം ആവശ്യപ്പെട്ടത്.
തേവര ജങ്ഷനിലെ ബസ് സ്റ്റോപ്പില്വെച്ച് പ്രദീപന് പരാതിക്കാരനില്നിന്ന് പണം വാങ്ങാന് ശ്രമിക്കുന്നതിനിടെ ആയിരുന്നു വിജിലന്സ് ഇയാളെ പിടികൂടിയത്. 90,000 രൂപയാണ് ഇയാള് കൈപ്പറ്റാന് ശ്രമിച്ചത്. പനമ്പള്ളി നഗറിന് സമീപം പണിത നാലുനില കെട്ടിടത്തിനായി താല്ക്കാലിക വൈദ്യുതി കണക്ഷനെടുത്തിരുന്നു. ഇത് സ്ഥിരപ്പെടുത്തണം അപേക്ഷയിലാണ് പ്രദീപന് കൈക്കൂലി ആവശ്യപ്പെട്ടത്. കെട്ടിടനിര്മാണ കമ്പനിയിലെ അസിസ്റ്റന്റ് മാനേജരാണ് വിജിലന്സിനെ സമീപിച്ചത്.
