തൃശ്ശൂര്: കോടാലിയില് എട്ടുവയസ്സുകാരന് പാമ്പുകടിയേറ്റു മരിച്ചു. കോടാലിയില് കാവുങ്ങല് സില്ജോ-ജോണ്സി ദമ്പതികളുടെ മകന് ആൻ ജോയാണ് മരിച്ചത്. ആനു ജോയുടെ സഹോദരന് അനോജ് ആശുപത്രിയില് ചികിത്സയിലാണ്. ഇന്നലെ പുലര്ച്ചെ രണ്ട് മണിയോടെ ദേഹാസ്വാസ്ഥ്യത്തെ തുടര്ന്ന് ഇരുവരെയും ആശുപത്രിയില് പ്രവേശിപ്പിക്കുകയായിരുന്നു.
തലേദിവസം രാത്രി ജ്യൂസ് കുടിച്ചതിന് ശേഷമാണ് കുട്ടികള് കിടന്നത്. അതുകൊണ്ട് കുട്ടികള്ക്ക് ഭക്ഷ്യവിഷബാധയേറ്റെന്നായിരുന്നു മാതാപിതാക്കള് കരുതിയത്. എന്നാല് ആശുപത്രിയിലെ പരിശോധനയിലാണ് പാമ്പ് കടിയേറ്റതാണെന്ന് മനസിലായത്. പിന്നാലെ ബന്ധുക്കൾ വീടിനുള്ളില് നടത്തിയ തിരച്ചിലില് കുട്ടികള് കിടന്നിരുന്ന മുറിയിലെ തലയണയ്ക്ക് അടിയില് നിന്ന് ശംഖുവരയൻ ഇനത്തിൽപ്പെട്ട പാമ്പിനെ കണ്ടെത്തുകയായിരുന്നു.
