നിലമ്പൂർ: ബാങ്കിൽനിന്ന് പണം പിൻവലിച്ച് പുറത്തിറങ്ങിയ യുവാവിനെ ആക്രമിച്ച് 99,500 രൂപ കവർന്ന സംഭവത്തിൽ ഒരാൾ അറസ്റ്റിൽ. നാട്ടുകല്ല് കൊടക്കാട് സ്വദേശി പനങ്ങാട്ടുതൊടി മുഹമ്മദ് ഷാഫി (23)യെയാണ് പ്രത്യേക അന്വേഷണസംഘം പിടികൂടിയത്. പുലർച്ചെ ഒരു മണിയോടെ കൊടക്കാടുള്ള വീട്ടിൽ നടത്തിയ പരിശോധനയിലാണ് പ്രതിയെ കസ്റ്റഡിയിലെടുത്തത്. പരാതിക്കാരന്റെ നീക്കങ്ങൾ നിരീക്ഷിച്ച് കവർച്ചാസംഘത്തിന് വിവരം കൈമാറിയത് ഷാഫിയാണെന്നാണ് പൊലീസിന്റെ കണ്ടെത്തൽ.
ഇന്നലെ രാവിലെ 11.45ഓടെയായിരുന്നു സിനിമാക്കഥയെ വെല്ലുന്ന കവർച്ച. നിലമ്പൂർ ജില്ലാ ആശുപത്രി റോഡിലെ ബാങ്ക് ഓഫ് ബറോഡയിൽനിന്ന് പണം പിൻവലിച്ച് പുറത്തിറങ്ങിയ അമരമ്പലം സൗത്ത് കിഴക്കേ പാലാമഠം സ്വദേശി കുമ്മാളി ഫിറോസിനെയാണ് കവർച്ചാസംഘം ലക്ഷ്യമിട്ടത്. ബാങ്കിന് പുറത്ത് കാത്തുനിന്ന സംഘം ഫിറോസിനെ ആക്രമിച്ച് പണമടങ്ങിയ പൊതി തട്ടിയെടുത്ത് കാറിൽ രക്ഷപ്പെടുകയായിരുന്നു. ആക്രമണത്തിൽ ഫിറോസിന്റെ കൈയ്ക്ക് പരിക്കേൽക്കുകയും ചെയ്തു.
സംഭവത്തിന് പിന്നാലെ ജില്ലാ പൊലീസ് മേധാവിയുടെ നിർദേശപ്രകാരം നിലമ്പൂർ ഡിവൈഎസ്പി കെ. റഫീക്കിന്റെ നേതൃത്വത്തിൽ പ്രത്യേക അന്വേഷണസംഘം രൂപീകരിച്ചു. പ്രദേശത്തെ സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് കവർച്ചാസംഘത്തെക്കുറിച്ച് പൊലീസിന് നിർണായക സൂചനകൾ ലഭിച്ചത്.
തുടർന്ന് നിലമ്പൂർ സി.ഐ എൻ.ബി. ഷൈജുവിന്റെ നേതൃത്വത്തിലുള്ള സംഘം കൊടക്കാടുള്ള ഷാഫിയുടെ വീട്ടിലെത്തി പുലർച്ചെ ഇയാളെ പിടികൂടി. ഫിറോസിന്റെ ബാങ്ക് ഇടപാടുകളും നീക്കങ്ങളും നിരീക്ഷിച്ച് കവർച്ചാസംഘത്തിന് വിവരം കൈമാറിയിരുന്നത് ഷാഫിയാണെന്നാണ് അന്വേഷണസംഘത്തിന്റെ കണ്ടെത്തൽ. അതായത് ബാങ്കിൽനിന്ന് പണവുമായി പുറത്തിറങ്ങുന്ന യുവാവിനെ ലക്ഷ്യമിടാൻ സംഘത്തിന് കൃത്യമായ വിവരം ലഭിച്ചിരുന്നു.



















