തിരുവനന്തപുരം: സംസ്ഥാനത്ത് ഈ അധ്യയനവര്ഷം മുതല് സ്കൂളുകളിലെ താത്കാലിക നിയമനങ്ങള് എംപ്ലോയ്മെന്റ് എക്സ്ചേഞ്ച് വഴി മാത്രം നടത്താന് സര്ക്കാര് തീരുമാനം. കോവിഡ് കാലം കഴിഞ്ഞുവരുന്ന പുതിയ അധ്യയനവര്ഷത്തില് അധ്യാപകക്ഷാമം രൂക്ഷമാകാതിരിക്കാന് ഒട്ടുമിക്ക വിദ്യാലയങ്ങളും ഇതിനകംതന്നെ നിയമന അഭിമുഖങ്ങള് നടത്തുകയോ നടപടികളാരംഭിക്കുകയോ ചെയ്തിട്ടുണ്ട്. പുതിയ ഉത്തരവ് വിദ്യാലയാധികൃതരെ ആശയക്കുഴപ്പത്തിലാക്കി.
സംസ്ഥാന എംപ്ലോയ്മെന്റ് ഡയറക്ടര് മേയ് 10-ന് പൊതുവിദ്യാഭ്യാസ ഡയറക്ടര്ക്ക് നല്കിയ കത്തിനെത്തുടര്ന്നാണ് വിദ്യാഭ്യാസവകുപ്പ് തീരുമാനം. പൊതുവിദ്യാഭ്യാസ വകുപ്പിന് കീഴിലുള്ള വിദ്യാലയങ്ങളിലെ അധ്യാപക, അനധ്യാപക തസ്തികകളിലെ താത്കാലിക നിയമനം എംപ്ലോയ്മെന്റ് എക്സ്ചേഞ്ച് വഴി മാത്രമേ നടത്താവൂവെന്ന നിര്ദേശം പൊതുവിദ്യാഭ്യാസ സീനിയര് അഡ്മിനിസ്ട്രേറ്റീവ് ഓഫീസറാണ് എല്ലാ വിദ്യാഭ്യാസ ഉപഡയറക്ടര്മാര്ക്കും അയച്ചത്.
