ഡല്ഹി: അന്തരിച്ച പ്രമുഖ നടനും മുന് എംപിയുമായ ഇന്നസെന്റിന്റെ നിര്യാണത്തില് അനുശോചനം അറിയിച്ച് പ്രധാനമന്ത്രി നരേന്ദ്രമോദി. ജനജീവിതത്തെ നര്മം കൊണ്ട് നിറച്ച ഇന്നസെന്റ് എന്നും ഓര്മിക്കപ്പെടുമെന്ന് നരേന്ദ്രമോദി ട്വിറ്ററില് കുറിച്ചു.
‘അദ്ദേഹത്തിന്റെ മരണം ഏറെ വേദനിപ്പിക്കുന്നതാണ്. ജനജീവിതത്തെ നര്മം കൊണ്ട് നിറച്ച ഇന്നസെന്റ് എന്നും ഓര്മിക്കപ്പെടും. ഈ അവസരത്തില് അദ്ദേഹത്തിന്റെ കുടുംബാംഗങ്ങളെയും ആരാധകരെയും അനുശോചനം അറിയിക്കുന്നു. അദ്ദേഹത്തിന്റെ ആത്മാവിന് നിത്യശാന്തി നേരുന്നുവെന്ന് മോദി ട്വിറ്ററില് കുറിച്ചു.
സഹപ്രവര്ത്തകരില് പലര്ക്കും ഇന്നസെന്റിന്റെ വിയോഗം താങ്ങാനായില്ല. വികാരഭരിതരായാണ് പലരും മാധ്യമങ്ങളോട് പ്രതികരിച്ചത്. മമ്മൂട്ടി ഉള്പ്പെടെയുള്ള നടന്മാര് കഴിഞ്ഞദിവസം ഇന്നസെന്റ് ചികിത്സയില് കഴിഞ്ഞിരുന്ന ആശുപത്രിയിലെത്തിയിരുന്നു. വിങ്ങിപ്പൊട്ടിക്കൊണ്ടാണ് ജയറാം ആശുപത്രിയിലെത്തിയതും മടങ്ങിയതും. ദിലീപ് നിറകണ്ണുകളോടെ ആശുപത്രിയിലുണ്ടായിരുന്നു. കൊച്ചിയില് കടവന്ത്ര ഇന്ഡോര് സ്റ്റേഡയിത്തില് പ്രിയനടനെ അവസാനമായി കാണാന് എത്തിയത് ആയിരങ്ങളായിരുന്നു.
പതിനൊന്നു മണിക്ക് കൊച്ചിയില് നിന്ന് മൃതദേഹം ഇരിങ്ങാലക്കുടയിലേക്ക് കൊണ്ടുപോകുമെന്ന് അറിയിച്ചെങ്കിലും അന്ത്യാഞ്ജലി അര്പ്പിക്കാനെത്തിയവരുടെ തിരക്കുകാരണം ഉച്ചവരെ കൊച്ചിയില് പൊതുദര്ശനം തുടരും. രാവിലെ മുതല് കുട്ടികളും സ്ത്രീകളും ഉള്പ്പടെ വന് ജനാവലിയായിരുന്നു ഇന്നസെന്റിന് അന്ത്യാജ്ഞലി അര്പ്പിക്കാനെത്തിയത്. മമ്മൂട്ടി, ദുല്ഖര് സല്മാന്, കുഞ്ചന്, സിബി മലയില്, ഫാസില്, ഇടവേള ബാബു, ബാബു രാജ്, സിദ്ധിഖ്, മോഹന്ജോസ്, മധുപാല്, പൊന്നമ്മ ബാബു തുടങ്ങി സിനിമാ രംഗത്തെ ഒട്ടേറെ പ്രമുഖരും രാഷ്ട്രീയ, സാംസ്കാരിക സാമൂഹിക നേതാക്കളും ആദരാഞ്ജലി അര്പ്പിചിച്ചു
