ന്യൂഡല്ഹി: ഐഫോണ് ഉപയോക്താക്കള്ക്ക് സൈബര് ആക്രമണ മുന്നറിയിപ്പുമായി പ്രമുഖ സ്മാര്ട്ട്ഫോണ് നിര്മ്മാതാക്കളായ ആപ്പിള്. ഇന്ത്യ അടക്കം 92 രാജ്യങ്ങളിലെ ഐഫോണ് ഉപയോക്താക്കള്ക്ക് ഇ-മെയില് മുഖേനയാണ് ആപ്പിള് മുന്നറിയിപ്പ് നല്കിയത്. ഹാക്കര്മാര് സൈബര് ആക്രമണം നടത്താനുള്ള സാധ്യതയുണ്ടെന്നും ജാഗ്രത പാലിക്കണമെന്നും ആപ്പിളിന്റെ സന്ദേശത്തില് പറയുന്നത്.
ഇന്ത്യന് ഉപയോക്താക്കള്ക്ക് വ്യാഴാഴ്ച പുലര്ച്ചെ 12.30 നാണ് ഇ-മെയില് വഴി അറിയിപ്പ് നല്കിയത്. ആപ്പിളില് നിന്ന് എത്ര പേര്ക്ക് ജാഗ്രതാ മുന്നറിയിപ്പ് ലഭിച്ചിട്ടുണ്ടെന്ന് വ്യക്തമല്ല. എന്എസ്ഒ ഗ്രൂപ്പിന്റെ പെഗാസസ് സ്പൈവെയറിനെ കുറിച്ചും ഇ-മെയിലില് പരാമര്ശിക്കുന്നുണ്ട്. ആഗോളതലത്തില് സൈബര് ആക്രമണത്തിന് ഇത്തരം ടൂളുകള് ഹാക്കര്മാര് ഉപയോഗിക്കാന് സാധ്യത ഉള്ളത് കൊണ്ട് ജാഗ്രത പുലര്ത്തണമെന്നാണ് മുന്നറിയിപ്പില് പറയുന്നത്.
