ആറ്റിങ്ങൽ ബാറുകളിൽ ഗുണ്ടാ സംഘത്തിന്റെ ആക്രമണം

ആറ്റിങ്ങൽ: ആറ്റിങ്ങലിൽ സ്വകാര്യ ബാറുകളിൽ ഗുണ്ടാ സംഘത്തിന്റെ ആക്രമണം. അഞ്ചംഗ സംഘമാണ് ആക്രമണം നടത്തിയത്. രണ്ടു ദിവസങ്ങൾക്കു മുൻപ് രാത്രിയിലായിരുന്നു ഗുണ്ടാ സംഘം ഭീകരത സൃഷ്ടിച്ചത്. ആറ്റിങ്ങൽ ദേവ് റെസിഡൻസി, ഹോട്ടൽ സൂര്യയിലുമായിരുന്നു ഗുണ്ടകളുടെ വിളയാട്ടം. മാരകായുധങ്ങളുമായെത്തിയ സംഘം വടിവാൾ കാണിച്ച് ജീവനക്കാരെ ഭീഷണിപ്പെടുത്തുകയും സാധനങ്ങൾ അടിച്ചു തകർക്കുകയും പണം കവരുകയും ചെയ്തു. ബാറുകളിലെത്തിയ ഉപഭോക്താക്കളെ വിരട്ടിയോടിക്കുകയും ചെയ്തിരുന്നു. ആക്രമണം നടത്തിയ സംഘത്തിലെ രണ്ട് പേർ ആറ്റിങ്ങൽ പൊലീസിന്റെ പിടിയിലായെന്നാണ് സൂചന.