കൊച്ചി: ഐഎസ്എല് മത്സരം നടക്കുന്നത് കണക്കിലെടുത്ത് കൊച്ചിയില് ഗതാഗത ക്രമീകരണം ഏര്പ്പെടുത്തി. വാഹനങ്ങള് പരമാവധി നഗരത്തിലേക്ക് പ്രവേശിപ്പിക്കാതെ മെട്രോ അടക്കമുള്ള പൊതുഗതാഗത സംവിധാനങ്ങള് പരമാവധി ഉപയോഗപ്പെടുത്താന് പൊലീസ് നിര്ദേശിച്ചു. പശ്ചിമ കൊച്ചി, വൈപ്പിന് ഭാഗങ്ങളില്നിന്ന് കളി കാണാനായി വരുന്നവരുടെ വാഹനങ്ങള് ചാത്യാത്ത് റോഡില് പാര്ക്ക് ചെയ്യണം. പറവൂര്, തൃശ്ശൂര്, മലപ്പുറം എന്നീ മേഖലകളില്നിന്നു വരുന്നവരുടെ വാഹനങ്ങള് ആലുവ ഭാഗത്തും കണ്ടെയ്നര് റോഡിലും പാര്ക്ക് ചെയ്യണം.
വൈകീട്ട് 5-നു ശേഷം എറണാകുളം ഭാഗത്തുനിന്ന് ഇടപ്പള്ളി, ചേരാനല്ലൂര്, ആലുവ, കാക്കനാട് ഭാഗങ്ങളിലേക്കുള്ള വാഹനങ്ങള് കലൂര് ജങ്ഷനില് നിന്ന് ഇടത്തേക്കു തിരിഞ്ഞ് പൊറ്റക്കുഴി- മാമംഗലം റോഡ് വഴി പോകണം. ചേരാനല്ലൂര്, ഇടപ്പള്ളി, ആലുവ, കാക്കനാട്, പാലാരിവട്ടം ഭാഗത്തുനിന്ന് എറണാകുളം ഭാഗത്തേക്കുള്ള വാഹനങ്ങള് വൈറ്റില ജങ്ഷന്, എസ് എ റോഡ് വഴി യാത്ര ചെയ്യണം.
