തിയറ്ററില്‍ വമ്പന്‍ വിജയമായതിനു പിന്നാലെ ദുല്‍ഖര്‍ സല്‍മാന്റെ ലക്കി ഭാസ്‌കര്‍ ഒടിടിയില്‍. നെറ്റ്ഫ്‌ളിക്‌സിലൂടെയാണ് ചിത്രം സ്ട്രീമിങ് ആരംഭിച്ചത്. തെലുങ്ക്, തമിഴ്, മലയാളം, കന്നഡ, ഹിന്ദി ഭാഷകളില്‍ ചിത്രം ലഭ്യമാണ്. ഒടിടിയില്‍ എത്തിയതിനു പിന്നാലെ മികച്ച അഭിപ്രായമാണ് ചിത്രത്തിന് ലഭിക്കുന്നത്.
വെങ്കി അത്‌ലൂരി സംവിധാനം ചെയ്ത തെലുങ്ക് ചിത്രം ഒക്ടോബര്‍ 31നാണ് തിയറ്ററിലെത്തിയത്. വമ്പന്‍ വിജയമായ ചിത്രം 111 കോടിക്ക് മേലെയാണ് കളക്റ്റ് ചെയ്തത്. സീതാരാമത്തിന്റെ വമ്പന്‍ വിജയത്തിനു ശേഷം ദുല്‍ഖറിന്റേതായി റിലീസ് ചെയ്ത തെലുങ്ക് ചിത്രമാണ് ലക്കി ഭാസ്‌കര്‍.ആദ്യ ദിവസം മുതല്‍ ഗംഭീര അഭിപ്രായം നേടിയ ചിത്രം മൗത്ത് പബ്ലിസിറ്റിയിലൂടെയാണ് തിയറ്റര്‍ പിടിച്ചത്. തെലുങ്കില്‍ മാത്രമല്ല മറ്റ് ഭാഷകളിലും ചിത്രം മികച്ച കളക്ഷനാണ് നേടിയത്. മീനാക്ഷി ചൗധരിയാണ് ചിത്രത്തില്‍ നായികയായി എത്തിയത്. കിങ് ഓഫ് കൊത്തയാണ് ദുല്‍ഖറിന്റെ അവസാനം പുറത്തിറങ്ങിയ മലയാള ചിത്രം.
