പാലോട്: കേരള സർവകലാശാല എം.എ സംസ്കൃതത്തിൽ ഒന്നാം റാങ്ക് നേടിയിരിക്കുകയാണ് തിരുവനന്തപുരം പാലോട് കരിമാൻകോട് ജന്നത്ത് മൻസിലിൽ ഐഫുന നുജൂം. ഐഫുനയ്ക്ക് ഇത് ആദ്യ റാങ്ക് നേട്ടമല്ല, ബി എ സംസ്കൃതത്തിലും ഒന്നാം റാങ്ക് ഈ മിടുക്കി സ്വന്തമാക്കിയിരുന്നു.
സംസ്കൃതം പഠിക്കാനുള്ള മകളുടെ ആഗ്രഹത്തിനൊപ്പമായിരുന്നു ഐഫുനയുടെ പിതാവ് എൻ. നുജൂമുദ്ദീനും മാതാവ് എസ്. നബീസത്ത് ബീവിയും. അഞ്ചാം ക്ലാസ് മുതലാണ് ഐഫുന സംസ്കൃതം പഠിച്ചു തുടങ്ങിയത്. അതുവരെ അറബിയും മലയാളവുമായിരുന്നു ഐഫുന പഠിച്ചത്. എന്നാൽ അഞ്ചാം ക്ലാസിൽ സംസ്കൃതം പഠിപ്പിക്കാനെത്തിയ ബാബു എന്ന അധ്യാപകൻ ചെലുത്തിയ സ്വാധീനമാണ് ആ ഭാഷ പഠിക്കുന്നതിൽ ഉറച്ചുനിന്നത്. പത്താം ക്ലാസ് വരെ സംസ്കൃതം പഠിച്ചു. തുടർന്നും സംസ്കൃതം പഠിക്കാനാണ് ഐഫുന ആഗ്രഹിച്ചത്. അങ്ങനെ ബിരുദത്തിനു സംസ്കൃതം ഐച്ഛിക വിഷയമായി തിരഞ്ഞെടുത്തു. ഒന്നാം റാങ്കോടെ തന്നെ തിരുവനന്തപുരം യൂണിവേഴ്സിറ്റി കോളേജിൽ നിന്ന് ഡിഗ്രി പൂർത്തിയാക്കി. ഇപ്പോൾ എംഎയ്ക്കും വിജയ കഥ തുടർന്നു.
ഐച്ഛിക വിഷയമായി സംസ്കൃതം എടുത്ത മുസ്ലീം സമുദായത്തിൽപ്പെട്ട ഐഫുനയോട് പലരും എന്തിനാണ് സംസ്കൃതം പഠിക്കുന്നതെന്ന് ചോദിച്ചിരുന്നു. അവർക്കെല്ലാം ഇരട്ട റാങ്ക് നേട്ടത്തോടെ മറുപടി കൊടുത്തിരിക്കുകയാണ് ഐഫുന നുജൂം.
