തൃശൂർ: തൃശൂർ – കൊടുങ്ങല്ലൂർ സംസ്ഥാന പാതയിൽ നടവരമ്പ് ചിറവളിൽ ലിമിറ്റഡ് സ്റ്റോപ്പ് ബസ് സ്കൂട്ടറിലിടിച്ചുണ്ടായ അപകടത്തിൽ വയോധിക മരിച്ചു. ഇരിങ്ങാലക്കുട പടിഞ്ഞാറെ നടയിൽ ‘വസന്തം’ വീട്ടിൽ റിട്ടയേർഡ് ബാങ്ക് ഉദ്യോഗസ്ഥനും ഗണിതശാസ്ത്രജ്ഞനുമായ ടി.എൻ. രാമചന്ദ്രന്റെ ഭാര്യ വസന്ത (70) ആണ് മരിച്ചത്.
ശ്രീകൂടൽമാണിക്യ ക്ഷേത്രദർശനം കഴിഞ്ഞ് കൊടുങ്ങല്ലൂർ ക്ഷേത്രദർശനത്തിനായി ഭർത്താവ് രാമചന്ദ്രനോടൊപ്പം സ്കൂട്ടറിൽ പോകുമ്പോഴായിരുന്നു അപകടം. ചിറവളവിൽ വെച്ച് കൊടുങ്ങല്ലൂരിൽ നിന്നും വരികയായിരുന്ന ‘ലവ് ലൈറ്റ്’ ബസ് ഇവർ സഞ്ചരിച്ച സ്കൂട്ടറിൽ തട്ടുകയായിരുന്നു. റോഡിലേക്ക് തെറിച്ചുവീണ വസന്തയുടെ മേൽ ബസ്സിന്റെ ചക്രങ്ങൾ കയറിയിറങ്ങി. സംഭവസ്ഥലത്ത് വെച്ച് തന്നെ ഇവർ മരണപ്പെട്ടു.
രാജീവ്, സജീവ്, രാഖീവ് (എല്ലാവരും എൻജിനീയർമാർ) എന്നിവരാണ് മക്കൾ. അശ്വതി, ദിവ്യ, മഞ്ജരി എന്നിവർ മരുമക്കളുമാണ്. ഇരിങ്ങാലക്കുട പൊലീസ് ഇൻക്വസ്റ്റ് ഉൾപ്പെടെയുള്ള തുടർനടപടികൾ സ്വീകരിച്ചു.
