ഡല്ഹി: രാജ്യത്തെ പെട്രോള് പമ്പുകളില് നിന്ന് വലിയ ക്യാനുകളിലും ബാരലുകളിലും ഇന്ധനം വില്ക്കുന്നത് തടയാന് കേന്ദ്ര പെട്രോളിയം മന്ത്രാലയത്തിന്റെ കര്ശന നിര്ദേശം. സുരക്ഷാ മാനദണ്ഡങ്ങള് ലംഘിച്ച് ഇന്ധനം വിതരണം ചെയ്യുന്ന പമ്പുകള്ക്കെതിരെ കടുത്ത നിയമനടപടികള് സ്വീകരിക്കുമെന്ന് സര്ക്കാര് മുന്നറിയിപ്പ് നല്കി.
ഇന്ധനക്ഷാമവുമായി ബന്ധപ്പെട്ട് ജനങ്ങള് പരിഭ്രാന്തരാകേണ്ട സാഹചര്യമില്ലെന്നും കേന്ദ്ര പെട്രോളിയം മന്ത്രാലയം അറിയിച്ചു. അന്താരാഷ്ട്ര വിപണിയിലെ അനിശ്ചിതത്വങ്ങളോ ഇന്ധനക്ഷാമം ഉണ്ടായേക്കാം എന്ന പ്രചരണങ്ങളോ കാരണം ജനങ്ങള് പരിഭ്രാന്തരായി ഇന്ധനം ശേഖരിച്ചുവെക്കുന്ന സാഹചര്യം ഒഴിവാക്കുക എന്നതും ഈ നടപടിയുടെ ലക്ഷ്യമാണ്.
ഇന്ധനം അനാവശ്യമായി പൂഴ്ത്തിവെക്കുന്നത് വിപണിയില് കൃത്രിമമായ ക്ഷാമം സൃഷ്ടിക്കുമെന്നും, അത് അവശ്യ സര്വീസുകളെ ബാധിക്കുമെന്നും സര്ക്കാര് ചൂണ്ടിക്കാട്ടി. നിലവില് രാജ്യത്ത് ആവശ്യത്തിന് ഇന്ധനശേഖരം ഉണ്ടെന്നും പരിഭ്രാന്തിയുടെ ആവശ്യമില്ലെന്നും അധികൃതര് വ്യക്തമാക്കി.
