തലസ്ഥാന നഗരത്തിന്റെ ക്രിസ്തുമസ് പുതുവത്സരാഘോഷങ്ങള്ക്ക് മാറ്റുകൂട്ടാന് നഗര വസന്തം പുഷ്പോത്സവം നാളെ ആരംഭിക്കും. സംസ്ഥാന ടൂറിസം വകുപ്പും തിരുവനന്തപുരം ജില്ലാ ടൂറിസം പ്രമോഷന് കൗണ്സിലും കേരള റോസ് സൊസൈറ്റിയും സംയുക്തമായി തിരുവനന്തപുരം നഗരസഭയുടെ സഹകരണത്തോടെയാണ് നഗരവസന്തം സംഘടിപ്പിക്കുന്നത്. പുഷ്പോത്സവത്തിന്റെ ഉദ്ഘാടനം നാളെ വൈകിട്ട് ആറിന് നിശാഗന്ധിയില് നടക്കുന്ന ചടങ്ങില് മുഖ്യമന്ത്രി പിണറായി വിജയന് നിര്വഹിക്കും. കനകക്കുന്നിലും നിശാഗന്ധിയിലും സുര്യകാന്തിയിലുമായി ഒരുക്കിയിട്ടുള്ള പുഷ്പോത്സവ പ്രദര്ശനത്തിലേക്ക് നാളെ (22-12-2022) വൈകിട്ട് മൂന്നു മണി മുതല് പൊതുജനങ്ങള്ക്ക് പ്രവേശനം അനുവദിക്കും.
മുതിര്ന്നവര്ക്ക് 100 രൂപയും 12 വയസുവരെയുള്ള കുട്ടികള്ക്ക് 50 രൂപയുമാണ് ടിക്കറ്റ് നിരക്ക്. രാത്രി 12 മണിവരെ പ്രദര്ശനം കാണാനുള്ള ടിക്കറ്റുകള് ലഭ്യമാകും. തിരക്ക് ഒഴിവാക്കുന്നതിനായി നഗരത്തിലെ അഞ്ചു കേന്ദ്രങ്ങളില് ടിക്കറ്റ് കൗണ്ടറുകള് സജ്ജമാക്കിയിട്ടുണ്ട്.കനകക്കുന്നിനുമുന്വശം, മ്യൂസിയത്തിനെതിര്വശത്തുള്ള ടൂറിസം ഓഫിസ്, ജവഹര് ബാലഭവനു മുന്വശത്തുള്ള പുഷ്പോത്സവത്തിന്റെ സംഘാടക സമിതി ഓഫിസ്, വെള്ളയമ്പലത്തെ ജില്ലാ ടൂറിസം പ്രമോഷന് കൗണ്സില് ഓഫിസ്, വഴുതക്കാട് ടാഗോര് തിയെറ്റര് എന്നിവിടങ്ങളിലാണ് ടിക്കറ്റ് കൗണ്ടറുകള് സജ്ജമാക്കിയിട്ടുള്ളത്. നഗരവസന്തത്തിന്റെ ഭാഗമായുള്ള പ്രദര്ശനം രാത്രി ഒരു മണിവരെ നീണ്ടു നില്ക്കും.
