മഴയ്ക്ക് ശമനം: ചിറയിന്‍കീഴില്‍ ഒരു ക്യാമ്പ് തുടരുന്നു

ആറ്റിങ്ങല്‍: ചൊവ്വാഴ്ച മഴ മാറിനിന്നതിനാല്‍ താലൂക്കിലെ താഴ്ന്ന പ്രദേശങ്ങളില്‍ നിന്ന് വെള്ളമിറങ്ങിത്തുടങ്ങിയിട്ടുണ്ട്. കിഴുവിലം വില്ലേജിലെ പടനിലം സ്‌കൂളിലെ ക്യാമ്പ് മാത്രമാണ് ഇപ്പോള്‍ പ്രവര്‍ത്തിക്കുന്നത്. തോട്ടവാരം വാര്‍ഡിലെ മൂന്ന് കുടുംബങ്ങളിലെ 14 പേരാണ് ഈ ക്യാമ്പിലുള്ളത്. വെള്ളം പൂര്‍ണമായി ഇറങ്ങിയശേഷമേ ഇവരെ വീടുകളിലേയ്ക്ക് മടക്കി അയയ്ക്കുകയുള്ളൂവെന്ന് താലൂക്ക് അധികൃതര്‍ അറിയിച്ചു. മൂന്നിടത്താണ് ഇത്തവണ ക്യാമ്പുകള്‍ തുറന്നത്. ഇതില്‍ ഒരു ക്യാമ്പ് തിങ്കളാഴ്ചയും മറ്റൊന്ന് ചൊവ്വാഴ്ചയും അവസാനിപ്പിച്ചു.