ചിറയിൻകീഴ്: ട്രെയിനിൽ നിന്ന് വിദ്യാര്ഥിനികള്ക്ക് നേരെ നഗ്നതാപ്രദര്ശനം നടത്തിയ മധ്യവയസ്കനെ സ്കൂള് അധികൃതര് പിടികൂടി റെയില്വെ പൊലീസില് ഏല്പ്പിച്ചു. ശ്രീകാര്യം സ്വദേശിയായ വിമുക്ത ഭടൻ സുരേഷ്കുമാറാണ് പിടിയിലായത്. കൊല്ലത്ത് ജോലി ചെയ്യുന്ന സുരേഷ്കുമാര് ട്രെയിനില് മടങ്ങുമ്പോള് ചിറയന്കീഴ് സ്റ്റേഷനില് വെച്ചാണ് സ്ഥിരമായി നഗ്നതാ പ്രദര്ശനം നടത്തിയിരുന്നത്. റെയില്വെ ട്രാക്കിന് സമീപത്ത് കൂടി നടന്നുപോകുന്ന പെണ്കുട്ടികള്ക്ക് നേരെയായിരുന്നു അശ്ലീല പ്രദര്ശനം. സീസണ് ടിക്കറ്റില് യാത്ര ചെയ്യുന്ന ഇയാള് ആഴ്ചകളായി ഇത് തുടര്ന്നതോടെ സ്കൂള് അധികൃതര് പൊലീസില് പരാതി നല്കി. എന്നാൽ ഫലമുണ്ടായില്ല.
ട്രെയിൻ ചിറയിന്കീഴ് സ്റ്റേഷനില് എത്തുമ്പോള് ശുചിമുറിയില് കയറുന്ന ഇയാൾ ഗ്ലാസ് ജനല് അഴിച്ചുമാറ്റിയാണ് പെണ്കുട്ടികള്ക്ക് നേരെ നഗ്നത കാണിച്ചിരുന്നത്. കഴിഞ്ഞദിവസം സ്കൂളിലെ അധ്യാപകരും മറ്റു ജീവനക്കാരും ട്രെയിനില് കയറി ഇയാളെ പിടിക്കുകയായിരുന്നു. പിന്നീട് റെയില്വെ പൊലീസിന് കൈമാറി.
