സ്വാതന്ത്ര്യത്തിന്റെ 75ാമത് വാര്‍ഷികാഘോഷങ്ങളുടെ ഭാഗമായി കേരള പോസ്റ്റല്‍ സര്‍ക്കിള്‍ വക്കം മൗലവിയേയും സ്വദേശാഭിമാനി രാമകൃഷ്ണ പിള്ളയേയും അനുസ്മരിപ്പിക്കുന്ന സവിശേഷ തപാല്‍ കവറുകള്‍ പുറത്തിറക്കി. മാസ്‌ക്കറ്റ് ഹോട്ടല്‍ സിംഫണി ഹാളില്‍ വൈകിട്ട് അഞ്ചിന് നടന്ന ചടങ്ങില്‍ ഗവര്‍ണര്‍ ആരിഫ് മുഹമ്മദ് ഖാന്‍ സവിശേഷ കവറുകളുടെ പ്രകാശനം നിര്‍വഹിച്ചു.
ചടങ്ങില്‍ കേരള തപാല്‍ സര്‍ക്കിളിലെ മികച്ച വനിതാ ജീവനക്കാരി ഉള്‍പ്പെടെ, മികച്ച എട്ട് തപാല്‍ ജീവനക്കാര്‍ക്ക് ഡാക് സേവാ അവാര്‍ഡുകളും വിതരണം ചെയ്തു. കേരള സര്‍ക്കിള്‍ ചീഫ് പോസ്റ്റ്മാസ്റ്റര്‍ ജനറല്‍ ശൂലി ബര്‍മന്‍ അധ്യക്ഷയായിരുന്നു. മറിയാമ്മ തോമസ്, നിര്‍മ്മലാദേവി, സി.ആര്‍. രാമകൃഷ്ണന്‍ എന്നിവരും സന്നിഹിതരായിരുന്നു.
