കിളിമാനൂർ: പകൽകുറി വൊക്കേഷണൽ ഹയർസെക്കന്ററി സ്കൂളിലെ വിഎച്ച്എസ്ഇ വിഭാഗം നാഷണൽ സർവ്വീസ് സ്കീമിന്റെ നേതൃത്വത്തിൽ പച്ചത്തുരുത്ത് പദ്ധതിക്ക് തുടക്കമായി. സംസ്ഥാന സർക്കാരിന്റെ നവകേരളമിഷൻ പ്രവർത്തനങ്ങൾക്ക് ഐക്യദാർഢ്യം പ്രകടിപ്പിച്ചാണ് പച്ചത്തുരുത്ത് പദ്ധതി തുടങ്ങിയത്. തരിശായി കിടക്കുന്ന പ്രദേശങ്ങൾ ഏറ്റെടുത്ത്, പ്രാദേശിക സവിശേഷതകൾക്കിണങ്ങുന്ന വൃക്ഷങ്ങൾ വച്ച് പിടിപ്പിച്ച് ചെറുവനങ്ങൾ രൂപപ്പെടുത്തുക എന്നതാണ് പദ്ധതിയിലൂടെ ലക്ഷ്യംവെയ്ക്കുന്നത്.
പദ്ധതിയ്ക്ക് സഹായവുമായി പള്ളിക്കൽ പഞ്ചായത്തും ഹരിതകേരളമിഷനും
രംഗത്തുണ്ട്. ചെറുവനങ്ങൾ രൂപപ്പെടുത്തുന്നതിൽ എൻആർഇജിഎസ് പദ്ദതിയും സംയോജിക്കുന്നുണ്ട്. പദ്ധതി യാഥാർത്ഥ്യമാകുന്നതോടെ ആവാസവ്യവസ്ഥയുടെ സംരക്ഷണവും സാധ്യമാകും. പദ്ധതിയുടെ ഉദ്ഘാടനം പള്ളിക്കൽ പഞ്ചായത്ത് പ്രിസിഡന്റ് എം. ഹസീന നിർവ്വഹിച്ചു. പിടിഎ പ്രസിഡന്റ് എസ്. മനു അധ്യക്ഷനായി. ജനപ്രതിനിധികളായ എ. നിഹാസ്, എസ് എസ് ബിജു, പി രഘൂത്തമൻ, നവകേരളമിഷൻ കിളിമാനൂർ ബ്ലോക്ക് തല ആർ പി പ്രവീൺ പ്രതീക്ഷ, പ്രഥമാധ്യാപിക എൻ എസ് ലക്കി, സ്റ്റാഫ് സെക്രട്ടറി ജി വിപിൻ എന്നിവർ സംസാരിച്ചു. സ്കൂൾ പ്രിൻസിപ്പാൾ ബി. ഷീബ സ്വാഗതവും പ്രോഗ്രാം ഓഫീസർ കെ. ഷിബു നന്ദിയും പറഞ്ഞു.
