ന്യൂഡല്ഹി: സാമ്പത്തിക രംഗത്ത് ഓരോ ദിവസവും പുതിയ മാറ്റങ്ങള് സംഭവിച്ച് കൊണ്ടിരിക്കുകയാണ്. സാങ്കേതികവിദ്യയുടെ കടന്നുവരവോടെ, മെച്ചപ്പെട്ട സേവനവും സുരക്ഷയും ഉറപ്പാക്കുന്നതിനാണ് പ്രധാനമായി മാറ്റങ്ങള് കൊണ്ടുവരുന്നത്. സാമ്പത്തിക രംഗത്ത് ഇന്നുമുതല് ഉണ്ടായ രണ്ടു മാറ്റങ്ങള് നോക്കാം. അക്കൗണ്ടില് ആവശ്യത്തിന് പണം ഇല്ലാത്ത കാരണത്താല് എടിഎം ഇടപാട് പൂര്ത്തിയാക്കാന് സാധിച്ചില്ലെങ്കില് ഇന്നുമുതല് പത്തുരൂപയും ജിഎസ്ടിയും ( പത്ത് രൂപ പ്ലസ് ജിഎസ്ടി) ചാര്ജ്ജായി ഈടാക്കുമെന്ന് പഞ്ചാബ് നാഷണല് ബാങ്ക് അറിയിച്ചു.
മ്യൂച്ചല് ഫണ്ടില് നിക്ഷേപിക്കാന് ഇ- വാലറ്റ് ഉപയോഗിക്കുന്നവര് കെവൈസി നടപടികള് പൂര്ത്തിയാക്കണമെന്ന് സെബി അറിയിച്ചു. റിസര്വ് ബാങ്ക് നിര്ദേശപ്രകാരമുള്ള ഈ വ്യവസ്ഥ നിക്ഷേപകര് പാലിക്കുന്നു എന്ന് മ്യൂച്ചല് ഫണ്ട് കമ്പനികള് ഉറപ്പാക്കണമെന്നും സെബിയുടെ ഉത്തരവില് പറയുന്നു. പുതിയ വ്യവസ്ഥ ഇന്നുമുതല് പ്രാബല്യത്തില് വന്നു. കെവൈസി നടപടികള് പൂര്ത്തിയാക്കാന് സാധിച്ചില്ലെങ്കില് ഇന്നുമുതല് ഇ- വാലറ്റ് വഴി നിക്ഷേപിക്കാന് സാധിക്കില്ല.
