കേസിൽ നീതി കിട്ടുന്നില്ലെന്ന് പരാതി; ജഡ്ജിയുടെ കാർ അടിച്ചുതകർത്തു

പത്തനംതിട്ട: ജഡ്ജിയുടെ ഔദ്യോഗിക വാഹനം തകർത്ത പ്രതി പിടിയിൽ. തിരുവല്ല കുടുംബ കോടതി ജഡ്ജിയുടെ കാറാണ് വൈകീട്ട് നാലരയോടെ കോടതിക്ക് മുന്നിൽ വെച്ച് അടിച്ചു തകർത്തത്. പ്രതി ജയപ്രകാശിനെ സംഭവ സ്ഥലത്ത് നിന്ന് തന്നെ പൊലീസ് കസ്റ്റഡിയിലെടുത്തു. തന്റെ കേസിൽ നീതി കിട്ടുന്നില്ലെന്ന് ആരോപിച്ചാണ് ജയപ്രകാശ് ആക്രമണം നടത്തിയതെന്ന് പൊലീസ് പറഞ്ഞു. ആക്രമണത്തിൽ കാറിന്റെ മുൻവശത്തെയും പിൻവശത്തെയും ചില്ലുകൾ തകർന്നിട്ടുണ്ട്. പ്രതിക്കെതിരെ പൊതുമുതൽ നശിപ്പിച്ചതിനടക്കം വകുപ്പുകൾ ചുമത്തി കേസെടുക്കുമെന്ന് പൊലീസ് വ്യക്തമാക്കി.