ആറ്റിങ്ങൽ – അവനവഞ്ചേരി സ്മാർട്ട് വില്ലേജ് ഓഫീസിന്റെ നിർമ്മാണ ഉദ്ഘാടനം മന്ത്രി കെ. രാജൻ നിർവഹിച്ചു. 2023 -24 സാമ്പത്തിക വർഷത്തെ പ്ലാൻ സ്കീമിൽ ഫണ്ട് ഉൾപ്പെടുത്തിയാണ് 50 ലക്ഷം രൂപ ചെലവിൽ സ്മാർട്ട് വില്ലേജ് ഓഫീസ് നിർമ്മിക്കുന്നത്. 2024 മാർച്ച് 07 രാവിലെ നിർമ്മാണ ഉദ്ഘാടനം എം.എൽ.എ ഒ.എസ്. അംബിക അധ്യക്ഷത വഹിച്ച ചടങ്ങിൽ റവന്യൂ – ഭവന നിർമ്മാണ വകുപ്പ് മന്ത്രി കെ. രാജൻ ഓൺലൈനായി നിർവഹിച്ചു.
എല്ലാവർക്കും ഭൂമി, എല്ലാ ഭൂമിക്കും രേഖ, എല്ലാ സേവനങ്ങളും സ്മാർട്ട് എന്ന സംസ്ഥാന സർക്കാരിന്റെ നയപരിപാടിയുടെ ഭാഗമായാണ് സംസ്ഥാനത്തെ എല്ലാ വില്ലേജ് ഓഫീസുകളും സ്മാർട്ട് വില്ലേജ് ഓഫീസുകൾ ആയി മാറ്റുന്നതെന്നും ഇത് സർക്കാരിൻറെ പ്രഖ്യാപിത ലക്ഷ്യമാണെന്നും മന്ത്രി തൻറെ പ്രസംഗത്തിൽ വ്യക്തമാക്കി. ചടങ്ങിൽ തിരുവനന്തപുരം അഡിഷണൽ മജിസ്ട്രേറ്റ് പ്രേംജി സ്വാഗതം ആശംസിച്ചു. ശിലാഫലകത്തിന്റെ അനാശ്ചാദനം എം.എൽ.എ ഒ.എസ്. അംബിക നിർവഹിച്ചു. മുൻസിപ്പൽ ചെയർപേഴ്സൺ അഡ്വ എസ്. കുമാരി, വാർഡ് കൗൺസിലർ ലൈല ബീവി, രാഷ്ട്രീയ പാർട്ടി പ്രതിനിധികളായ കെ .എസ് . ബാബു , നഹാസ് ആലംകോട് തുടങ്ങിയവർ ആശംസകൾ അർപ്പിച്ചു. തഹസിൽദാർ ജാസ്മിൻ ജോർജ് നന്ദി പറഞ്ഞു.
