സെറ്റോ സംഘടനകളുടെ നേതൃത്വത്തിൽ അധ്യാപകരും ജീവനക്കാരും നടത്തിയ പൊതുപണിമുടക്ക് കിളിമാനൂർ മേഖലയിലെ വിദ്യാഭ്യാസ സ്ഥാപനങ്ങളുടെയും, ഓഫീസുകളുടെയും പ്രവർത്തനത്തെ സാരമായി ബാധിച്ചു. മിക്ക സർക്കാർ ഓഫീസുകളിലും ജീവനക്കാരുടെ ഹാജർ നില വളരെ കുറവായിരുന്നു.
ഭരണ പ്രതിപക്ഷ ഭേദമന്യേ ജീവനക്കാർ സമരത്തിൽ പങ്കെടുത്തത് കാരണം മിനി സിവിൽ സ്റ്റേഷനിലെ ചില ഓഫീസുകളുടെ പ്രവർത്തനം പൂർണമായും സ്തംഭിച്ചു. പണിമുടക്കിയ അധ്യാപകരുടെയും ജീവനക്കാരുടെയും നേതൃത്വത്തിൽ കിളിമാനൂർ പ്രൈവറ്റ് ബസ് സ്റ്റാൻഡിൽ നിന്നും മിനി സിവിൽ സ്റ്റേഷനിലേക്ക് പ്രകടനം നടത്തി. മിനി സിവിൽ സ്റ്റേഷനു മുന്നിൽ നടത്തിയ പ്രതിഷേധ സംഗമത്തിൽ എൻജിഒ അസോസിയേഷൻ സംസ്ഥാന കമ്മിറ്റി അംഗം ടി എസ് നിസാം അധ്യക്ഷത വഹിച്ചു. കെ പി എസ് ടി എ ജില്ലാ പ്രസിഡന്റ് എ ആർ ഷെമീം സംഗമം ഉദ്ഘാടനം ചെയ്തു. സംസ്ഥാന സെക്രട്ടറിയേറ്റ് അംഗം എ പി സന്തോഷ്ബാബു, എസ് സബീർ, കെ സജീവ്, എം എ ബാലചന്ദ്രൻ, ഫിറോസ്ഖാൻ, എം ജെ അനൂപ് ഉൾപ്പെടെയുള്ള നേതാക്കൾ പങ്കെടുത്തു. ഹരിശങ്കർ ജെ കുറുപ്പ് നന്ദി രേഖപ്പെടുത്തി.
