കൊല്ലം: വൃദ്ധ കിണറ്റില് മരിച്ചനിലയില് കണ്ടെത്തിയ സംഭവം കൊലപാതകമെന്ന് പൊലീസ് കണ്ടെത്തല്. തൃക്കരുവ ഞാറയ്ക്കല് ആനചുട്ടമുക്കിനു സമീപം ഈരത്തഴികത്ത് പൊന്നമ്മ (62) മരിച്ചതാണ് കൊലപാതകമാണെന്ന് കണ്ടെത്തിയത്. സംഭവത്തില് മകന് വര്ഗീസ് (32) അറസ്റ്റിലായി.
കഴിഞ്ഞ 15-ന് മൂന്നുമണിയോടെയാണ് പൊന്നമ്മയെ വീട്ടുപറമ്പിലെ കിണറ്റില് മരിച്ചനിലയില് കണ്ടെത്തിയത്. അമ്മ കിണറ്റില് വീണുകിടക്കുന്നതായി വര്ഗീസ് ബഹളംവെച്ച് അയല്ക്കാരെ അറിയിക്കുകയായിരുന്നു. തുടര്ന്ന് ഫയര്ഫോഴ്സും പൊലീസും സ്ഥലത്തെത്തി പൊന്നമ്മയെ പുറത്തെടുത്തെങ്കിലും മരിച്ചിരുന്നു. മൃതദേഹപരിശോധനയില് അസ്വാഭാവികത കണ്ടതിനെത്തുടര്ന്ന് വര്ഗീസ് പൊലീസിന്റെ നിരീക്ഷണത്തിലായിരുന്നു. അമ്മയെ കിണറ്റില് തള്ളിയിട്ടതാണെന്ന് വര്ഗീസ് ചിലരോടു പറഞ്ഞതായി പോലീസിനു വിവരം ലഭിച്ചു. തുടര്ന്ന് ഇയാളെ കസ്റ്റഡിയിലെടുത്ത് ചോദ്യംചെയ്തപ്പോള് കുറ്റം സമ്മതിക്കുകയായിരുന്നു.
