കണ്ണൂര്: കണ്ണൂര് നഗരത്തില് ഭീതി പടര്ത്തി വീണ്ടും തെരുവ് നായ ആക്രമണം. പതിനൊന്ന് പേര്ക്ക് കടിയേറ്റു. പുതിയ ബസ് സ്റ്റാന്ഡ്, റെയില്വെ സ്റ്റേഷന് പരിസരങ്ങളിലാണ് തെരുവ് നായ ആളുകളെ ആക്രമിച്ചത്. രാവിലെ ആറ് മണിയോടെ ആയിരുന്നു നായയുടെ ആക്രമണം. പരിക്കേറ്റവര് ആശുപത്രിയില് ചികിത്സതേടി. ഇന്നലെ 56 പേരെ തെരുവ് നായ ആക്രമിച്ചിരുന്നു.
താവക്കര പുതിയ ബസ് സ്റ്റാന്ഡ് പ്രഭാത് ജങ്ഷന്, എസ് ബി ഐ ബാങ്ക് റോഡ് പരിസരം, പഴയ ബസ് സ്റ്റാന്ഡ് പ്രദേശം എന്നിവിടങ്ങളില് ആയിരുന്നു ചൊവാഴ്ച തെരുവ് നായ ആളുകളെ ആക്രമിച്ചത്. നഗരത്തില് വിവിധ ആവശ്യങ്ങള്ക്കായി എത്തിയ വഴി യാത്രക്കാര്ക്കാണ് കടിയേറ്റത്. വിദ്യാര്ഥിനിയെ നായ ആക്രമിക്കുന്ന ദൃശ്യങ്ങള് ഉള്പ്പെടെ പുറത്തുവരികയും ചെയ്തിരുന്നു.
എന്നാല്, പിന്നീട് ഈ നായയെ ചത്തനിലയില് കണ്ടെത്തുകയും ചെയ്തിരുന്നു. ഇതിന് പിന്നാലെയാണ് ഇന്നും നായയുടെ ആക്രമണം റിപ്പോര്ട്ട് ചെയ്തിരിക്കുന്നത്.
