ബോളിവുഡിൽ ഏറ്റവും താരമൂല്യമുള്ള നടനാണ് അക്ഷയ് കുമാർ. മലയാളത്തിലെ നിരവധി സൂപ്പർഹിറ്റ് സിനിമകളുടെ ഹിന്ദി റീമേക്കുകളിലാണ് അദ്ദേഹം വേഷമിട്ടിട്ടുള്ളത്. ആ സിനിമകളെല്ലാം വൻ വിജയങ്ങളുമായിരുന്നു. തമിഴ്, കന്നഡ സിനിമകളിൽ താരം അഭിനയിച്ചിട്ടുണ്ടെങ്കിലും മലയാളത്തിലേക്ക് എത്തിയിട്ടില്ല. ഇപ്പോൾ മലയാളം സിനിമയിൽ അഭിനയിക്കാനുള്ള താൽപ്പര്യത്തെക്കുറിച്ച് തുറന്നു പറഞ്ഞിരിക്കുകയാണ് അക്ഷയ് കുമാർ. മോഹൻലാലിനൊപ്പം മലയാളത്തിൽ അഭിനയിക്കണം എന്നാണ് താരം പറഞ്ഞത്.
തന്റെ പുതിയ ചിത്രമായ രക്ഷാബന്ധന്റെ പ്രമോഷനുമായി ബന്ധപ്പെട്ട് ആരാധകരുമായി സംവദിക്കുകയായിരുന്നു താരം. അതിനിടെയാണ് മലയാളിയായ ആരാധകൻ ചോദ്യവുമായി എത്തിയത്. ഒരുപാട് മലയാള സിനിമകൾ ഹിന്ദിയിൽ റീമേക്ക് ചെയ്ത് സൂപ്പർഹിറ്റ് ആക്കിയിട്ടുള്ള താങ്കൾ എന്നാണ് മലയാളത്തിൽ അഭിനയിക്കുക എന്നായിരുന്നു ആരാധകന്റെ ചോദ്യം.
മലയാള സിനിമയിൽ അഭിനയിക്കാൻ സന്തോഷമേ ഉള്ളൂവെന്നും പക്ഷേ തനിക്ക് മലയാളം സംസാരിക്കാൻ അറിയാത്തതാണ് പ്രശ്നം എന്നുമായിരുന്നു അക്ഷയ് കുമാറിന്റെ മറുപടി. മറ്റാരെക്കൊണ്ടെങ്കിലും ഡബ്ബ് ചെയ്താൽ പോരെ എന്നായി ആരാധകൻ. തനിക്ക് തന്റെ സ്വന്തം ശബ്ദത്തിൽ സംസാരിക്കുന്നതാണ് ഇഷ്ടമെന്നും മറ്റൊരാൾ തനിക്ക് വേണ്ടി ഡബ് ചെയ്യുന്നതിൽ താൽപര്യമില്ലെന്നും താരം വ്യക്തമാക്കി. ഇതിനു പിന്നാലെയാണ് മോഹൻലാലിനൊപ്പം മലയാളത്തിൽ അഭിനയിക്കാനുള്ള താൽപ്പര്യത്തെക്കുറിച്ച് പറഞ്ഞത്.
എനിക്കൊരു മലയാളം സിനിമ ചെയ്യാൻ ആഗ്രഹമുണ്ട്. തമിഴിൽ ഞാൻ രജനികാന്തിനൊപ്പം അഭിനയിച്ചു, കന്നടയിലും അഭിനയിച്ചു. ഇനി മലയാളത്തിൽ മോഹൻലാലിനോടൊപ്പം അഭിനയിക്കണം. മോഹൻലാലിനൊപ്പം ഒരു ചിത്രത്തിൽ എന്നെ അഭിനയിപ്പിക്കുമോ എന്ന് പ്രിയദർശനോട് ചോദിക്കും. അങ്ങനെ സംഭവിക്കുകയാണെങ്കിൽ അതൊരു ബഹുമതിയായിത്തന്നെ കരുതും.’’ അക്ഷയ് കുമാർ പറഞ്ഞു.
നാളെയാണ് രക്ഷാബന്ധൻ റിലീസിന് എത്തുന്നത്. നാല് സഹോദരിമാരുള്ള ഒരു സഹോദരന്റെ കഥയാണ് ചിത്രം പറയുന്നത്. അക്ഷയ് കുമാറിന്റെ രണ്ട് സിനിമകളിൽ ബോക്സ് ഓഫിസിൽ വൻ പരാജയമായതിനു പിന്നാലെ എത്തുന്ന ചിത്രമാണ് ഇത്. അതിനാൽ ഏറെ പ്രതീക്ഷയോടെയാണ് സിനിമാലോകം ചിത്രത്തെ നോക്കിക്കാണുന്നത്.
