ഇന്ത്യയുടെ ടോപ് ഡബിള്സ് സഖ്യം സാത്വിക് സായ്രാജ് റാന്കിറെഡ്ഡി- ചിരാഗ് ഷെട്ടി സഖ്യം ബാഡ്മിന്റണ് ഏഷ്യ ചാമ്പ്യന്ഷിപ്സ് പോരാട്ടത്തിന്റെ ഫൈനലില്. കലാശപ്പോരിലേക്ക് കടന്നതോടെ ഇന്ത്യന് സഖ്യം മെഡലും ഉറപ്പാക്കി. 1965ന് ശേഷം ആദ്യമായാണ് ഇന്ത്യന് ഡബിള്സ് സഖ്യം ഈ പോരാട്ടത്തിന്റെ ഫൈനലിലേക്ക് മുന്നേറുന്നത്.
സെമിയില് നിലവിലെ ഒളിംപിക്സ് ചാമ്പ്യന്മാരായ ചൈനീസ് തായ്പേയ് സഖ്യം ലീ യങ്- വാങ് ചി ലിന് സഖ്യവുമായാണ് ഏറ്റുമുട്ടിയത്. മത്സരത്തിനിടെ ചിന് ലിന് പരിക്കേറ്റ് പിന്മാറേണ്ടി വന്നതോടെ ഇന്ത്യന് സഖ്യം മത്സരം തീരും മുന്പേ ഫൈനല് ഉറപ്പാക്കി.
ആദ്യ സെറ്റില് ഇന്ത്യന് സഖ്യം 21-18 എന്ന സ്കോറില് വിജയം സ്വന്തമാക്കിയിരുന്നു. രണ്ടാം സെറ്റില് 14-13 എന്ന സ്കോറില് ഇന്ത്യന് സഖ്യം മുന്നില് നില്ക്കെയാണ് ചിന് ലിനിന് പരിക്കേറ്റത്. പിന്നാലെ ചൈനീസ് തായ്പേയ് സഖ്യം പിന്മാറി. എട്ടാം സീഡായ മലേഷ്യന് സഖ്യം യോ സിന്- ടിയോ ഈ യി ടീമിനെയാണ് ഇന്ത്യന് സഖ്യം ഫൈനലില് നേരിടുക. സെമിയില് ജപ്പാന് ജോഡികളായ തകുറോ ഹോകി- യുഗോ കൊബയാഷി സഖ്യത്തെ വീഴ്ത്തിയാണ് മലേഷ്യന് ടീമിന്റെ ഫൈനല് പ്രവേശം.
