മൈസുരു: പൊതുസ്ഥലത്തെ മൂത്രമൊഴിക്കല് തടയുന്നതിനായി പുതിയ രീതിയില് മതില് സ്ഥാപിച്ച് മൈസുരു സിറ്റി കോര്പ്പറേഷന്. 800 മീറ്റര് നീളമുള്ള മതിലില് കണ്ണാടിക്ക് സമാനമായ സ്റ്റെയിന്ലെസ് സ്റ്റീല് പാനലുകളാണ് ഘടിപ്പിച്ചിരിക്കുന്നത്. പൗരബോധം വളര്ത്താന് നവീനമായ ഇടപെടലായാണ് ഇത് വിലയിരുത്തപ്പെടുന്നത്.
മതിലിന് സമീപം നില്ക്കുന്ന ആരെയും വഴിപോക്കര്ക്ക് വ്യക്തമായി കാണാന് കഴിയുന്ന രീതിയിലാണ് ഇതിന്റെ ഉപരിതലം രൂപകല്പ്പന ചെയ്തിരിക്കുന്നതെന്ന് അധികൃതര് പറയുന്നു. ഇത് പൊതുസ്ഥലത്ത് മൂത്രമൊഴിക്കുന്നവരില് ഒരു മാനസികമായ വിമുഖത ഉണ്ടാക്കുമെന്നും അവര് ചൂണ്ടിക്കാട്ടുന്നു.
വൈകുന്നേരങ്ങളിലും രാത്രിസമയങ്ങളിലും പാനലുകള്ക്ക് ചുറ്റും എല്ഇഡി ലൈറ്റുകളും സ്ഥാപിച്ചിട്ടുണ്ട്. തെരുവ് വിളക്കുകള് തെളിയുന്നതിനൊപ്പം ഈ ലൈറ്റുകളും തനിയെ തെളിയും. ഏകദേശം 9.5 ലക്ഷം രൂപ ചെലവഴിച്ചാണ് ഈ പദ്ധതി നടപ്പിലാക്കിയതെന്ന് ഉദ്യോഗസ്ഥര് പറഞ്ഞു. സംസ്ഥാനത്ത് ഇത്തരത്തിലുള്ള ആദ്യത്തെ സംരംഭമാണിത്.
