ന്യൂഡല്ഹി: ഡല്ഹി വനിതാ കമ്മീഷന് അധ്യക്ഷ സ്വാതി മലിവാളിന്റെ കൈ കാറില് കുടുക്കി വലിച്ചിഴച്ചു. വ്യാഴാഴ്ച പുലര്ച്ചെ മൂന്ന് മണിക്ക് ഡല്ഹി എയിംസിന് സമീപത്തുവച്ചായിരുന്നു അതിക്രമം. സംഭവവുമായി ബന്ധപ്പെട്ട് 47 കാരനായ കാര് ഡ്രൈവര് ഹരീഷ് ചന്ദ്രയെ പൊലീസ് അറസ്റ്റ് ചെയ്തു.
ഡല്ഹിയിലെ സ്ത്രീകളുടെ സുരക്ഷിതത്വവുമായി ബന്ധപ്പെട്ട് പരിശോധന നടത്താനെത്തിയപ്പോഴായിരുന്നു സംഭവം. ഡല്ഹി എയിംസ് ആശുപത്രിയുടെ രണ്ടാം നമ്പര് ഗേറ്റിന് സമീപത്തുനില്ക്കുകായിരുന്നു സ്വാതി മലിവാളും മറ്റുള്ളവരും. ഈ സമയത്ത് ഒരു കാര് വന്ന് അവര്ക്ക് സമീപം നിര്ത്തി. തുടര്ന്ന് മോശമായി പെരുമാറുകയും കാറില് കയറാന് ആവര്ത്തിച്ച് ആവശ്യപ്പെടുകയും ചെയ്തു. തുടര്ന്ന് സ്വാതി മലിവാളും ഡ്രൈവറും തമ്മില് തര്ക്കമുണ്ടായി. കാറിന്റെ ഡോറില് കൈവച്ച് സംസാരിക്കുന്നതിനിടെ ഡ്രൈവര് പെട്ടന്ന് ഗ്ലാസ് അടയ്ക്കുകയും ഇവരുടെ കൈ കാറിനകത്ത് കുരുങ്ങുകയുമായിരുന്നു. ഇതറിഞ്ഞിട്ടും ഡ്രൈവര് കാര് മുന്നോട്ടെടുത്തു. പതിനഞ്ച് മീറ്ററോളം കാര് ഇവരെ വലിച്ചിഴച്ചതായും പൊലീസ് പറയുന്നു.
