ചിറയിൻകീഴ്: സിപിഎം ശാർക്കര ലോക്കൽ കമ്മിറ്റി അംഗത്തിന്റെ വീടിന് നേരെ ബോംബിന് സമാനമായ സ്ഫോടക വസ്തുക്കൾ എറിഞ്ഞതായി പരാതി. മുൻ ചിറയിൻകീഴ് പഞ്ചായത്ത് അംഗവും നിലവിൽ ശാർക്കര ലോക്കൽ കമ്മിറ്റി അംഗവുമായ ബീജ സുരേഷിന്റെ ചിറയിൻകീഴ് പുതുക്കരിയിലുള്ള വീടിന് നേരെയാണ് ആക്രമണം ഉണ്ടായത്.
കഴിഞ്ഞ ദിവസം രാത്രി പത്തുമണിയോടെയാണ് സംഭവം. ബൈക്കിലെത്തിയ സംഘം വീടിന് മുന്നിൽ നിന്ന് ബോംബിന് സമാനമായ സ്ഫോടക വസ്തുക്കൾ വീടിനുള്ളിലേക്ക് എറിയുകയായിരുന്നു. രണ്ട് സ്ഫോടക വസ്തുക്കൾ ഗേറ്റിനുള്ളിൽ വീണ് പൊട്ടിയതായി വീട്ടുകാർ പറഞ്ഞു. മറ്റൊന്ന് പൊട്ടാതെ വീടിന്റെ സിറ്റൗട്ടിൽ വീണു.
സംഭവത്തെ തുടർന്ന് വീട്ടുകാർ ഉടൻ ചിറയിൻകീഴ് പോലീസിൽ വിവരമറിയിച്ചു. പോലീസ് സംഘം സ്ഥലത്തെത്തി പരിശോധന നടത്തി. പോലീസ് അന്വേഷണം ആരംഭിച്ചു.
