ചിറയിൻകീഴ്: മഹാത്മാഗാന്ധി കുടുംബ സംഗമത്തിന് ചിറയിൻകീഴ് ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ തുടക്കമായി. താഴംപള്ളി വാർഡ് കോൺഗ്രസ് കമ്മിറ്റിയുടെ നേതൃത്വത്തിൽ കുടുംബ സംഗമം സംഘടിപ്പിച്ചു. വാർഡ് പ്രസിഡൻ്റ് ലിപിൻ ലോറൻസിൻ്റെ അധ്യക്ഷതയിൽ ചേർന്ന യോഗം കെ.പി.സി.സി ജനറൽ സെക്രട്ടറി അഡ്വ.കെ.പി ശ്രീകുമാർ ഉദ്ഘാടനം ചെയ്തു .
കേന്ദ്രസർക്കാർ പാർലമെന്റിൽ അവതരിപ്പിച്ച ബജറ്റ് വെളിവാക്കുന്നത് ബിജെപിയുടെ അധികാര താൽപര്യമാണെന്ന് അദ്ദേഹം അഭിപ്രായപ്പെട്ടു. ബീഹാർ നിയമസഭയാണെന്ന് തെറ്റിദ്ധരിച്ചാണ് കേന്ദ്രമന്ത്രി നിർമല സീതാരാമൻ കേന്ദ്ര ബജറ്റ് പാർലമെന്റിൽ അവതരിപ്പിച്ചതെന്ന് അദ്ദേഹം പരിഹസിച്ചു.
രാജ്യത്തിന്റെ സമഗ്ര വികസനത്തിനായി തുക വകയിരുത്തേണ്ട കേന്ദ്ര ബഡ്ജറ്റ് ഒരു സംസ്ഥാനത്തിന് വേണ്ടി മാത്രമായി ചിലവഴിക്കുന്നത് വരാൻ പോകുന്ന സംസ്ഥാന തെരഞ്ഞെടുപ്പിൽ തങ്ങളുടെ അധികാരം ഉറപ്പിക്കാൻ വേണ്ടിയാണെന്നും, കേന്ദ്രത്തിന്റെ ഈ നടപടി തകർക്കുന്നത് രാജ്യത്തിന്റെ ഫെഡറൽ സംവിധാനത്തെ മാത്രമല്ല രാജ്യത്തിന്റെ ദേശീയ കാഴ്ചപ്പാടിനെ കൂടിയാണെന്നും കെ.പി ശ്രീകുമാർ കൂട്ടിച്ചേർത്തു. മത്സ്യബന്ധന മേഖലയെ പൂർണ്ണമായും അവഗണിക്കുന്ന നയമാണ് കേന്ദ്ര – സംസ്ഥാന സർക്കാരുകൾ സ്വീകരിക്കുന്നതെന്നും അദ്ദേഹം ആരോപിച്ചു.
ഡി.സി.സി ജനറൽ സെക്രട്ടറിമാരായ എം.ജെ ആനന്ദ്, കെ.എസ് അജിത് കുമാർ, കെ.പി രാജശേഖരൻ നായർ, എഫ്. ജെഫേഴ്സൺ, ചിറയിൻകീഴ് ബ്ലോക്ക് കോൺഗ്രസ് പ്രസിഡന്റ് കെ.ആർ അഭയൻ, മംഗലപുരം ബ്ലോക്ക് പ്രസിഡണ്ട് എം.എസ് നൗഷാദ്, ദളിത് കോൺഗ്രസ് ജില്ലാ പ്രസിഡണ്ട് ബി.എസ് അനൂപ്, മണ്ഡലം പ്രസിഡണ്ട്മാരായ മോനി ശാർക്കര, സുനിൽ പെരുമാതുറ, എം.എ ജബ്ബാർ, കീഴുവിലം ബിജു, കടയറ ജയചന്ദ്രൻ, കോൺഗ്രസ്സ് മണ്ഡലം ഭാരവാഹികളായ എസ്.എം.ഷഹീർ, മനുമോൻ.ആർ.പി, വി.ബേബി, ഷൈജു വലിയകട, ബ്ലോക്ക് ഭാരവാഹികളായ വർഗ്ഗീസ്, ജയന്തി കൃഷ്ണ, ജെറോം, ജോയി ലിയോൺസ്, പുതുക്കരി സുരേഷ്, അശോകൻ പഴഞ്ചിറ തുടങ്ങിയവർ പങ്കെടുത്തു. മഹാത്മാഗാന്ധി കുടുംബ സംഗമങ്ങൾ ചിറയിൻകീഴ് ബ്ലോക്ക് കോൺഗ്രസ് കമ്മിറ്റിയുടെ കീഴിൽ വരുന്ന 75 വാർഡുകളിലും നടത്തുവാൻ തീരുമാനിച്ചതായി ബ്ലോക്ക് കോൺഗ്രസ് കമ്മിറ്റി പ്രസിഡൻ്റ് കെ.ആർ അഭയൻ അറിയിച്ചു.
