സ്വകാര്യ വ്യക്തിയുടെ കിണറ്റിൽ വീണ മയിലിനെ ഫയർ ആൻഡ് റെസ്ക്യൂ ടീം എത്തി രക്ഷിച്ചു. മടവൂർ ഗ്രാമപഞ്ചായത്തിലെ പതിനൊന്നാം വാർഡിൽ ഞാറയിൽക്കോണം വടക്കേവിള വീട്ടിൽ മുഹമ്മദ് ഇല്യാസിന്റെ വീട്ടിലെ കിണറ്റിലാണ് കഴിഞ്ഞ ദിവസം വൈകുന്നേരം 4 മണിയോടെ മയിൽ അകപ്പെട്ടത്. വീട്ടുകാർ പഞ്ചായത്ത് അംഗത്തിന് വിവരം അറിയിച്ചതിനെ തുടർന്ന് പാലോട് ഫോറസ്റ്റ് ഓഫീസിൽ വിവരമറിയിക്കുകയും അവിടെ നിന്നും രണ്ടു വനം വകുപ്പ് ഉദ്യോഗസ്ഥർ സ്ഥലത്തെത്തുകയും ചെയ്തു.
എന്നാൽ കിണറ്റിനുള്ളിൽ അകപ്പെട്ട മയിലിനെ പുറത്തെടുക്കാൻ ഫോറസ്റ്റ് ഉദ്യോഗസ്ഥർക്ക് സാധിച്ചില്ല. തുടർന്ന് അവർ വിവരമറിയിച്ചതിനെ തുടർന്ന് നാവായിക്കുളം അഗ്നിരക്ഷാ നിലയത്തിൽ നിന്നും എത്തിയ സംഘമാണ് മൈലിനെ കിണറ്റിൽ നിന്നും ജീവനോടെ രക്ഷപ്പെടുത്തിയത്. കിണറ്റിൽ നിന്നും പുറത്തെടുത്ത മൈലിനെ വനവകുപ്പ് ഉദ്യോഗസ്ഥർ ഏറ്റുവാങ്ങുകയും സുരക്ഷിത മേഖലയിൽ തുറന്നു വിടുമെന്നും അറിയിച്ചു.
അസിസ്റ്റന്റ് സ്റ്റേഷൻ ഓഫീസർ പ്രദീപ്കുമാറിന്റെ നേതൃത്വത്തിൽ ഫയർ ആൻഡ് റെസ്ക്യൂ ഓഫീസർമാരായ അരവിന്ദൻ, സജികുമാർ, അനന്തു, നിഷാന്ത്, വിനീഷ് കുമാർ, ഹോം ഗാർഡുമാരായ ബിജു, മുരളീധരൻ പിള്ള എന്നിവർ ദൗത്യത്തിൽ പങ്കെടുത്തു.
