ആറ്റിങ്ങൽ: മണ്ണെടുത്തതിനെ തുടർന്ന് റോഡ് അപകടാവസ്ഥയിൽ, യാത്രക്കാരുടെ സുരക്ഷ ഉറപ്പുവരുത്തണമെന്ന് നാട്ടുകാർ. ആലംകോട് ഗവ.എൽ.പി.എസ് – മണ്ണൂർ ഭാഗം റോഡിൽ ആണ് ഈ അപകടാവസ്ഥയുള്ളത്. ഈറോഡ് തകർന്നടിഞ്ഞിട്ടു മാസങ്ങളോളമായി. ഇരുചക്രവാഹനങ്ങളിൽ പോകുന്നവർ കുഴിയിൽ വീണ് അപകടങ്ങൾ സംഭവിക്കുന്നതും പതിവാണ്.
അതിന് ഉപരി റോഡിനോട് ചേർന്ന് ചില സ്വകാര്യ വ്യക്തികൾ ആഴത്തിൽ മണ്ണെടുത്തിരിക്കുന്നത് ആണ് നിലവിൽ ആശങ്ക സൃഷ്ടിക്കുന്നത്. മഴക്കാലമായതോടെ ഈ ഭാഗത്ത് റോഡ് ഇടിഞ്ഞ് താഴുമോ എന്ന് ആശങ്കയുണ്ട്. വീതി കുറഞ്ഞ റോഡിന്റെ ടാറിനോട് ചേർന്നാണ് ആഴത്തിൽ കുഴിച്ചിരിക്കുന്നത്. നിരവധി സ്കൂൾ വാഹനങ്ങൾ അടക്കം കടന്നു പോകുന്ന ഈ റോഡിൽ വൻ അപകട സാധ്യത നിലനിൽക്കുകയാണ്. കൊടും വളവും, കയറ്റവും ഉൾപ്പെടുന്ന സ്ഥലത്ത് ആണ് വൻകുഴി അപകട ഭീഷണിയുടെ വ്യാപ്തി കൂട്ടുന്നത്. അടിയന്തിരമായി പ്രശ്നത്തിൽ ഇടപെട്ട് അപകട സാധ്യത ഒഴിവാക്കാനുള്ള നടപടികൾ സ്വീകരിക്കണം എന്ന് ആവശ്യപ്പെട്ട് കോൺഗ്രസ് നേതാവ് എം.എച്ച്.അഷ്റഫ് ആറ്റിങ്ങൽ നഗരസഭാ സെക്രട്ടറി നിവേദനം നൽകി.
