മകരവിളക്ക് ദര്ശന ദിവസമായ ജനുവരി 14 ന് ഉച്ചയ്ക്ക് 12 വരെ മാത്രമായിരിക്കും ഭക്തര്ക്ക് ശബരിമല സന്നിധാനത്തേക്ക് പ്രവേശനം. ദര്ശനത്തിനുള്ള എല്ലാ പോയിന്റുകളിലും ശക്തമായ സുരക്ഷയൊരുക്കാന് ശബരിമല എ ഡി എം, പി. വിഷ്ണുരാജിന്റെ നേതൃത്വത്തില് ചേര്ന്ന വിവിധ വകുപ്പുകളുടെ ഏകോപന യോഗത്തില് തീരുമാനമായി.
12 ന് ശേഷം യാതൊരു കാരണവശാലും ഭക്തരെ പമ്പയില് നിന്ന് സന്നിധാനത്തേക്ക് പ്രവേശിപ്പിക്കുന്നതല്ല. മകരസംക്രമ പൂജ 14 ന് രാത്രി 8.45 ന് നടക്കും. തുടര്ന്ന് പിറ്റെ ദിവസമായിരിക്കും ഭക്തരെ പ്രവേശിപ്പിക്കുക. ശബരിമല തീര്ഥാടനവുമായി ബന്ധപ്പെട്ട് ഹൈക്കോടതിയുടെ ഉത്തരവ് പ്രകാരമുള്ള സുരക്ഷാ മുന്കരുതലുകള് സ്വീകരിക്കും. മകരവിളക്ക് ദര്ശനത്തിനു മുന്നോടിയായുള്ള ഒരുക്കങ്ങള് ശബരിമല സന്നിധാനത്ത് പൂര്ത്തിയായി. സന്നിധാനത്തും പമ്പയിലും നിലയ്ക്കലിലും തിരക്ക് നിയന്ത്രിക്കുന്നതിന് നടപടി സ്വീകരിക്കും.
