തിരുവനന്തപുരം: സീരിയൽ നടിയുടെ കൈ തെരുവ് നായ കടിച്ച് മുറിച്ചു. ആകാശവാണി ആർട്ടിസ്റ്റും സീരിയൽ നടിയുമായ ഭരതന്നൂർ സ്വദേശിനി ശാന്തയെയാണ് തെരുവ് നായ ആക്രമിച്ചത്. ഭക്ഷണം കൊടുക്കുന്നതിനിടെയായിരുന്നു സംഭവം.
ഇന്നലെയാണ് ശാന്തയ്ക്ക് തെരുവ് നായയുടെ കടിയേറ്റത്. ആക്രമണത്തിൽ ശാന്തയുടെ കൈയ്ക്ക് സാരമായി പരിക്കേറ്റിട്ടുണ്ട്. വലതു കൈയാണ് നായ കടിച്ച് പറിച്ചത്. നിലവിൽ തിരുവനന്തപുരം മെഡിക്കൽ കോളേജ് ആശുപത്രിയിൽ ചികിത്സയിലാണ് ശാന്ത. കഴിഞ്ഞ അഞ്ച് വർഷമായി ഇവർ തെരുവ് നായ്ക്കൾക്ക് ഭക്ഷണം നൽകിവരികയാണ്. ഭരതന്നൂർ മാർക്കറ്റിലും ജംഗ്ഷനിലും അലഞ്ഞ് തിരിയുന്ന നായ്ക്കൾക്കാണ് ഇവർ ഭക്ഷണം നൽകാറുള്ളത്. ഏകദേശം 50 ഓളം തെരുവ് നായ്ക്കളാണ് ഇവിടെ അലഞ്ഞു തിരിയുന്നത്.
