തിരുവനന്തപുരം: സംസ്ഥാനത്തെ വിശ്വകര്മ്മ വിഭാഗക്കാരുടെ പ്രത്യേകമായ പ്രശ്നങ്ങൾ പഠിക്കേണ്ട സാഹചര്യം ഉണ്ടെങ്കിൽ സംസ്ഥാന പിന്നോക്ക വിഭാഗം കമ്മീഷനെ ചുമതലപ്പെടുത്തുന്ന കാര്യം പരിഗണിക്കാമെന്ന് മന്ത്രി കെ. രാധാകൃഷ്ണൻ സഭയെ അറിയിച്ചു. നിയമസഭാ ചട്ടം 62 പ്രകാരം ‘ശങ്കരന് കമ്മീഷന് റിപ്പോര്ട്ടിലെ അപാകതകള് പരിഹരിച്ച് ജനസംഖ്യാനുപാതത്തില് വിശ്വകര്മ്മജര്ക്ക് ലഭിക്കേണ്ട ആനുകൂല്യങ്ങള് കണക്കാക്കുന്നതിനും പഠിക്കുന്നതിനും പുതിയ ഒരു കമ്മീഷനെ നിയമിക്കുക’ എന്നത് സംബന്ധിച്ച് പ്രമോദ് നാരായൺ എംഎൽഎ ഉന്നയിച്ച ശ്രദ്ധ ക്ഷണിക്കലിനുളള മറുപടി നൽകുയായിരുന്നു മന്ത്രി.
സംസ്ഥാനത്തെ പിന്നാക്ക വിഭാഗത്തില് ഉള്പ്പെടുന്ന വിശ്വകര്മ്മജരുടെ വിവിധ പ്രശ്നങ്ങള് പഠിക്കുന്നതിന് 2012 വര്ഷം ഡോ. പി.എന്. ശങ്കരനെ ഏകാംഗ കമ്മീഷനായി നിയമിക്കുകയും, കമ്മീഷന് 2014 ഡിസംബർ 13 ന് റിപ്പോർട്ട് സര്ക്കാരില് സമര്പ്പിക്കുകയും ചെയ്തു. 21 ശുപാര്ശകളാണ് കമ്മീഷന് റിപ്പോര്ട്ടില് ഉണ്ടായിരുന്നത്. ഇതില് 13 ശുപാര്ശകളിന്മേല് തുടര് നടപടികള് സ്വീകരിക്കേണ്ടതില്ലെന്ന് സര്ക്കാര് ഉത്തരവായിരുന്നു. ക്രമനമ്പര് 6, 7 ശുപാര്ശകള് വിശ്വകര്മ്മ പെന്ഷന് പദ്ധതിയില് വിശ്വകര്മ്മയുടെ എല്ലാ വിഭാഗങ്ങളെയും ഉള്പ്പെടുത്തുന്നതിനും, വിശ്വകര്മ്മ പെന്ഷന് തുക വര്ദ്ധിപ്പിക്കുന്നതിനുമുള്ളതായിരുന്നു.
വിശ്വകര്മ്മയുടെ എല്ലാ അവാന്തര വിഭാഗങ്ങളേയും ഉള്പ്പെടുത്തിയും, പെന്ഷന് തുക മറ്റു സാമൂഹ്യ പെന്ഷനുകള്ക്ക് തുല്യമായി വര്ദ്ധിപ്പിച്ച് പ്രത്യേകം ഉത്തരവുകള് പുറപ്പെടുവിച്ചിട്ടുണ്ടന്നും മന്ത്രി വ്യക്തമാക്കി. ക്രമനമ്പര് 8, 14 ശുപാര്ശകളില് തുടര് നടപടി സ്വീകരിക്കുന്നതിന് തൊഴിലും നൈപുണ്യവും വകുപ്പിനും, ശുപാര്ശ 9 ന് സഹകരണ വകുപ്പിനും, ശിപാര്ശ 11 ന് റവന്യു വകുപ്പിന് 19, 20 ശുപാര്ശകള് വ്യവസായ വകുപ്പ് മുഖേന നടപ്പിലാക്കുന്നതിനുള്ള നിര്ദ്ദേശം സര്ക്കാര് നല്കിയിട്ടുണ്ട്. സംസ്ഥാനത്തെ വിവിധ പിന്നാക്ക വിഭാഗങ്ങളുടെ കൃത്യമായ ജനസംഖ്യാ കണക്കുകള് ഔദ്യോഗികമായി ലഭ്യമല്ലാത്തതിനാല് നിലവിലെ സംവരണ വിഹിതം പുനഃക്രമീകരിക്കുന്നത് പ്രായോഗികമല്ലെന്നും മന്ത്രി മറുപടി നൽകി.
