ചെന്നൈ: തമിഴ്നാട്ടില് ചരക്ക് ട്രെയിനിന് തീപിടിച്ച് അപകടം. തിരുവള്ളൂര് റെയില്വേ സ്റ്റേഷന് സമീപത്ത് വച്ചാണ് ഗുഡ്സ് ട്രെയിനിന്റെ അഞ്ച് വാഗണുകളില് ആണ് തീ പടര്ന്നത്. ഞായറാഴ്ച പുലര്ച്ചെ 5:30 ഓടെ ആണ് ഡീസല് ശേഖരിച്ച ട്രെയിന് വാഗണുകളില് തീ പിടിച്ചത്. വലിയ തോതില് തീ പടര്ന്നതിന്റെ ദൃശ്യങ്ങള് പുറത്തുവന്നു. തിരുവള്ളൂര് റെയില്വേ സ്റ്റേഷന് സമീപം വച്ചായിരുന്നു ട്രയിനിന് തീപിടിച്ചത്.
സംഭവത്തില് ആളപായം റിപ്പോര്ട്ട് ചെയ്തിട്ടില്ല. തീപിടിത്തം നിയന്ത്രണ വിധേയമാക്കാനുള്ള ശ്രമങ്ങള് നടക്കുകയാണ്. പത്തോളം അഗ്നിശമന സേനാ യൂണിറ്റുകളുടെ നേതൃത്വത്തിലാണ് നടപടികള് പുരോഗമിക്കുന്നത്. വന് തോതില് തീ പടര്ന്നെങ്കിലും ജീവഹാനിയോ ചുറ്റുമുള്ള വസ്തുക്കള്ക്ക് നാശനഷ്ടമോ ഉണ്ടായിട്ടില്ലെന്ന് ഉദ്യോഗസ്ഥര് സ്ഥിരീകരിച്ചു. മുന്കരുതല് നടപടിയായി സമീപ പ്രദേശങ്ങളില് നിന്ന് ആളുകളെ ഒഴിപ്പിച്ചു.
തീപിടിത്തം സംഭന്ധിച്ച് അന്വേഷണം നടത്തുമെന്ന് റെയില്വെ അറിയിച്ചു. അപകടത്തെ തുടര്ന്ന് ട്രെയിന് ഗതാഗതം താറുമാറായി. ചെന്നൈയിലേക്കും തിരിച്ചുമുള്ള ട്രെയിന് സര്വീസുകള് തടസ്സപ്പെട്ടു. എട്ട് ട്രെയിനുകള് റദ്ദാക്കി. നിരവധി ട്രെയിനുകള് വഴിതിരിച്ചുവിട്ടതായും റിപ്പോര്ട്ടുകളുണ്ട്.
