നെടുമങ്ങാട് കോടതിയിലെ അഭിഭാഷകനായ അലിഫിനെ പോലീസ് മർദിച്ച സംഭവും,
തിരുവനന്തപുരം ബാറിലെ അഭിഭാഷകൻ അഡ്വ. വിനോദിനെതിരെ സാമൂഹ്യവിരുദ്ധന്മാർ നടത്തിയ ആക്രമണവും ചർച്ച ചെയ്യുവാൻ ആറ്റിങ്ങൽ ബാർ അസോസിയേഷൻ ഇന്ന് അടിയന്തര ജനറൽ ബോഡി യോഗം ബാർ അസോസിയേഷൻ ഹാളിൽ ചേർന്നു.
കഴിഞ്ഞ കുറച്ചുനാളുകളായി അഭിഭാഷകർക്കെതിരെ നിരന്തരം ഉണ്ടായിക്കൊണ്ടിരിക്കുന്ന കടന്നാക്രമങ്ങൾക്കെതിരെ ശക്തമായി പ്രതിഷേധിച്ചു കൊണ്ട് ആറ്റിങ്ങൽ ബാർ അസോസിയേഷന്റെ അടിയന്തിര ജനറൽ ബോഡി യോഗ തീരുമാനപ്രകാരം, ആറ്റിങ്ങൽ ബാർ അസോസിയേഷനിലെ മുഴുവൻ അഭിഭാഷകരും ഇന്ന് കോടതി നടപടികളിൽ നിന്നും വിട്ട് നിന്നു കൊണ്ട് ശക്തമായ പ്രതിഷേധം രേഖപ്പെടുത്തി.
ഇത്തരം സംഭവങ്ങൾ ഇനി മേലിൽ ആവർത്തിക്കാതിരിക്കുക, അഭിഭാഷകർക്കു നേരെ തൊഴിലിടത്തിൽ ഉണ്ടാകുന്ന അതിക്രമണങ്ങൾക്ക് ശാശ്വത പരിഹാരം കണ്ടെത്തുക എന്നീ ആവശ്യങ്ങൾ ഉന്നയിച്ചു കൊണ്ടായിരുന്നു പ്രതിഷേധം.
ബാർ അസോസിയേഷൻ പ്രസിഡന്റ് അഡ്വ.എസ്. ബെൻസി, ബാർ അസോസിയേഷൻ സെക്രട്ടറി അഡ്വ. ദിലീപ്. വി. എൽ, ട്രഷറർ അഡ്വ. മംഗലാപുരം ഷിബു, വൈസ് പ്രസിഡന്റ് അഡ്വ. ലിഷ രാജ്. ആർ, ജോയിന്റ് സെക്രട്ടറി അഡ്വ. ക്രോസ്സ് ആന്റണി, എക്സിക്യൂട്ടീവ് കമ്മിറ്റി അംഗങ്ങളായ അഡ്വ. മിഥുൻ മങ്കാട്ട്, അതുല്യ, ദിവ്യ, വിജിൽ എന്നിവർ നേതൃത്വം നൽകി.
