കൊല്ക്കത്ത: കൊല്ക്കത്തയില് യുവ ഡോക്ടറെ ബലാത്സംഗം ചെയ്തു കൊലപ്പെടുത്തിയ കേസിലെ ഏക പ്രതി സഞ്ജയ് റോയ് കുറ്റക്കാരെന്നു കോടതി കണ്ടെത്തി. പ്രതിക്കുള്ള ശിക്ഷ സിബിഐ കോടതി തിങ്കളാഴ്ച വിധിക്കും.
കഴിഞ്ഞ വര്ഷം ഓഗസ്റ്റിലാണ് ആര്ജി കര് മെഡിക്കല് കോളജില് ഡ്യൂട്ടിയിലുണ്ടായിരുന്ന ഡോക്ടര് ക്രൂര പീഡനത്തിന് ഇരയായി കൊല്ലപ്പെട്ടത്. ആശുപത്രിയിലെ സുരക്ഷാ ജീവനക്കാരനാണ് പ്രതി സഞ്ജയ് റോയി.
ആദ്യം കൊല്ക്കത്ത പൊലീസും തുടര്ന്ന് സിബിഐയുമാണ് ഏറെ കോളിളക്കമുണ്ടാക്കിയ കേസ് അന്വേഷിച്ചത്. പ്രതിക്ക് തൂക്കുകയര് ഉറപ്പാക്കുമെന്ന് മുഖ്യമന്ത്രി മമത ബാനര്ജി പറഞ്ഞിരുന്നു. സുപ്രീംകോടതിയും ഹൈക്കോടതിയും നിര്ണായക ഇടപെടല് നടത്തിയ സംഭവത്തില് കൊലപാതകം നടന്ന് 5 മാസത്തിന് ശേഷമാണ് വിധി പറയുന്നത്.
