തിരുവനന്തപുരം: സംസ്ഥാനത്ത് ഓണക്കാലത്തെ മദ്യവില്പ്പനയില് റെക്കോര്ഡ്. കഴിഞ്ഞ ആറു ദിവസത്തിനിടെ മാത്രം മദ്യവില്പ്പനയില് വന്വര്ധനയാണ് രേഖപ്പെടുത്തിയത്. കഴിഞ്ഞ ദിവസങ്ങളില് ബെവ്കോയില് 512.11 കോടിയുടെ മദ്യവില്പ്പനയാണ് നടന്നത്. കഴിഞ്ഞ വര്ഷം സമാന കാലയളവില് ഇത് 460.8 കോടി രൂപയായിരുന്നുവെന്ന് കണക്കുകള് വ്യക്തമാക്കുന്നു.
ഇന്നലെ വരെയുള്ള കണക്കനുസരിച്ച് മദ്യവില്പ്പനയില് കഴിഞ്ഞ വര്ഷത്തെ അപേക്ഷിച്ച് ഏകദേശം 52 കോടി രൂപയുടെ വര്ധനയാണ് രേഖപ്പെടുത്തിയത്. ഇന്നും ഉത്രാട ദിനത്തിലും മദ്യവില്പ്പന കൂടുമെന്നാണ് ബെവ്കോയുടെ കണക്കുകൂട്ടല്.
കഴിഞ്ഞ ശനിയാഴ്ച മാത്രം 102 കോടിയുടെ മദ്യവില്പ്പനയാണ് നടന്നത്. കഴിഞ്ഞ മൂന്ന് ദിവസത്തിനിടെ 279.12 കോടിയുടെ മദ്യമാണ് സംസ്ഥാനത്ത് വിറ്റത്. ലഹരിമാഫിയയെ തളയ്ക്കാന് സംസ്ഥാന സര്ക്കാര് പ്രഖ്യാപിച്ച ‘ഓപ്പറേഷന് തൂഫാ’നെത്തുടര്ന്ന് മയക്കുമരുന്ന് കിട്ടാതായവര് മദ്യത്തിലേക്കു തിരിയുന്നുവെന്നതിനു തെളിവാണ് കുതിച്ചുയരുന്ന മദ്യ വില്പ്പനയെന്നാണ് പൊലീസിന്റെ നിഗമനം.
