by Midhun HP News | Oct 28, 2026 | Latest News, കേരളം
ദേശീയപാതകളിലെ ടോൾ പ്ലാസകൾക്ക് സമീപം താമസിക്കുന്ന സ്വകാര്യ വാഹന ഉടമകൾക്ക് ആശ്വാസമായി കേന്ദ്ര സർക്കാരിന്റെ പുതിയ വാർഷിക ടോൾ പാസ് പദ്ധതി. ടോൾ പ്ലാസയുടെ സ്ഥാനം അനുസരിച്ച് 1,500 രൂപയും 3,000 രൂപയും നിരക്കിൽ പാസ് ലഭ്യമാക്കാനാണ് തീരുമാനം. ടോൾ പ്ലാസയുടെ 20 കിലോമീറ്റർ പരിധിക്കുള്ളിൽ താമസിക്കുന്ന അർഹരായവർക്കാണ് ഈ ആനുകൂല്യം ലഭിക്കുക. 2026 നവംബർ 1 മുതൽ പുതിയ സംവിധാനം പ്രാബല്യത്തിൽ വരും.
റോഡ് ഗതാഗത, ഹൈവേ മന്ത്രാലയം ഒക്ടോബർ 26-ന് പുറത്തിറക്കിയ വിജ്ഞാപനത്തിലാണ് പദ്ധതിയുടെ വിശദാംശങ്ങൾ വ്യക്തമാക്കിയത്. ടോൾ പ്ലാസകൾക്ക് സമീപം താമസിക്കുന്നവർക്ക് ടോൾ ചെലവിൽ ഇളവ് നൽകുകയും യാത്രാഭാരം കുറയ്ക്കുകയുമാണ് പദ്ധതിയുടെ ലക്ഷ്യം. കലണ്ടർകാണുക
നഗരത്തിന് അകത്തോ പുറത്തോ? നിരക്കിൽ വ്യത്യാസം
ടോൾ പ്ലാസ സ്ഥിതി ചെയ്യുന്ന പ്രദേശത്തിന്റെ അടിസ്ഥാനത്തിലാണ് വാർഷിക പാസ് നിരക്ക് നിശ്ചയിച്ചിരിക്കുന്നത്. മുനിസിപ്പൽ അല്ലെങ്കിൽ പ്രാദേശിക പട്ടണ പരിധിക്ക് പുറത്തുള്ള ടോൾ പ്ലാസകൾക്ക് സമീപം താമസിക്കുന്ന അർഹരായ സ്വകാര്യ വാഹന ഉടമകൾക്ക് 1,500 രൂപ നൽകി വാർഷിക പാസ് നേടാം. നഗരപരിധിക്കുള്ളിലുള്ള ടോൾ പ്ലാസകൾക്ക് സമീപം താമസിക്കുന്നവർക്ക് പാസ് നിരക്ക് 3,000 രൂപ ആയിരിക്കും.
എന്നാൽ ടോൾ പ്ലാസയിൽനിന്ന് 20 കിലോമീറ്റർ പരിധിക്കുള്ളിൽ താമസിക്കുന്നു എന്നതുകൊണ്ടുമാത്രം എല്ലാവർക്കും ആനുകൂല്യം ലഭിക്കില്ല. പദ്ധതിയിൽ നിർദേശിച്ചിട്ടുള്ള മറ്റ് നിബന്ധനകളും പാലിക്കണം
എല്ലാവർക്കും ലഭിക്കില്ല; നിബന്ധനകൾ അറിയണം
ക്ലോസ്ഡ് യൂസർ ഫീ കളക്ഷൻ സംവിധാനത്തിന് കീഴിൽ പ്രവർത്തിക്കുന്ന ദേശീയപാതകളിലും എക്‌സ്പ്രസ് വേകളിലും ഈ ആനുകൂല്യം ലഭ്യമാകില്ല. ടോൾ പ്ലാസയ്ക്ക് സമീപം സർവീസ് റോഡോ ബദൽ റോഡോ ലഭ്യമായ സ്ഥലങ്ങളിലും പദ്ധതിയുടെ ആനുകൂല്യം അനുവദിക്കില്ലെന്നാണ് വ്യവസ്ഥ.
വാണിജ്യേതര ആവശ്യങ്ങൾക്കായി രജിസ്റ്റർ ചെയ്ത സ്വകാര്യ വാഹനങ്ങൾക്കു മാത്രമാണ് പാസ് ലഭിക്കുക. കൂടാതെ, വാഹനത്തിൽ സാധുവായതും പ്രവർത്തനക്ഷമവുമായ ഫാസ്ടാഗ് ഉണ്ടായിരിക്കണം. അർഹത ഉറപ്പാക്കുന്നതിന് ഈ നിബന്ധനകൾ നിർണായകമാണ്.
രാജ്യത്തെ എല്ലാ ടോൾ പ്ലാസകളിലും ഉപയോഗിക്കാനാകുമോ?
ഇല്ല. പുതിയ വാർഷിക പാസ് രാജ്യത്തെ എല്ലാ ടോൾ പ്ലാസകളിലും ഉപയോഗിക്കാവുന്ന പൊതുപാസല്ല. ആനുകൂല്യം അനുവദിക്കുന്ന നിർദ്ദിഷ്ട ടോൾ പ്ലാസയുമായി ബന്ധപ്പെട്ടാണ് ഇത് ബാധകമാകുക. അതിനാൽ പാസ് എടുക്കുന്നതിന് മുമ്പ് സ്വന്തം താമസസ്ഥലവും ബന്ധപ്പെട്ട ടോൾ പ്ലാസയും പദ്ധതിയുടെ നിബന്ധനകൾക്ക് കീഴിൽ വരുന്നതാണോയെന്ന് പരിശോധിക്കണം.
നവംബർ 1 മുതൽ പദ്ധതി നടപ്പിലാകുന്നതോടെ ദേശീയപാതകളിലെ ടോൾ പ്ലാസകൾക്ക് സമീപം താമസിക്കുന്ന അർഹരായ സ്വകാര്യ വാഹന ഉടമകൾക്ക് വാർഷിക ചെലവ് കുറയ്ക്കാൻ അവസരം ലഭിക്കും. എന്നാൽ പാസ് ലഭിക്കാനുള്ള യോഗ്യതയും ബാധകമായ നിരക്കും ഉറപ്പാക്കിയശേഷം മാത്രമേ അപേക്ഷിക്കാവൂ.
by Midhun HP News | Oct 28, 2026 | Latest News, കേരളം
ദീർഘകാലമായി ടാക്സ് അടക്കാതെ നികുതി കിടിശ്ശികയായികിടക്കുന്ന മോട്ടോർ വാഹനങ്ങൾക്കായി കേരള സർക്കാർ *ഒറ്റത്തവണ തീർപ്പാക്കൽ പദ്ധതി* (One Time Settlement Scheme) വീണ്ടും നടപ്പിലാക്കുന്നു. 2022 മാർച്ച് 31 ന് ശേഷം ടാക്സ് അടക്കാൻ കഴിയാത്തതും അതിന് മുൻപ് എത്ര കാലത്തേക്കും നികുതി കിടിശ്ശികയുള്ള വാഹന ഉടമകൾക്ക് ഈ സുവർണ്ണാവസരം പ്രയോജനപ്പെടുത്താം. നാല് വർഷത്തിൽ കൂടുതലായി എത്ര കാലത്തെ കുടിശ്ശികയുണ്ടെങ്കിലും 01.04.2022 മുതൽ 31.03.2026 വരെയുള്ള നികുതി കുടിശ്ശികയുടെ നിശ്ചിത ശതമാനം തുക മാത്രം താഴെ പറയുന്ന നിരക്കിൽ അടച്ച് തീർപ്പാക്കാൻ ഈ പദ്ധതി അവസരം നൽകുന്നു:
*നോൺ-ട്രാൻസ്പോർട്ട് (Private)* *വാഹനങ്ങൾ:* 2026 മാർച്ച് 31 വരെയുള്ള നാല് വർഷത്തെ നികുതി കുടിശ്ശികയുടെ 40 ശതമാനം മാത്രം.
*ട്രാൻസ്പോർട്ട് വാഹനങ്ങൾ:* 2026 മാർച്ച് 31 വരെയുള്ള നാല് വർഷത്തെ നികുതി കുടിശ്ശികയുടെ 30 ശതമാനം മാത്രം.
ഈ ഒറ്റത്തവണ നികുതി തീർപ്പാക്കൽ സൗകര്യം *2027 മാർച്ച് 31 വരെ* ലഭ്യമായിരിക്കും. പദ്ധതി പ്രയോജനപ്പെടുത്തുന്ന വാഹന ഉടമകളെ ഗ്രീൻ ടാക്സ് അടയ്ക്കുന്നതിൽ നിന്നും ക്ഷേമനിധി രസീത് ഹാജരാക്കുന്നതിൽ നിന്നും ഒഴിവാക്കിയിട്ടുണ്ട്. മോഷ്ടിക്കപ്പെട്ടതോ പൊളിച്ചുമാറ്റിയതോ ഉപയോഗശൂന്യമായതോ ആയ വാഹനങ്ങളുടെ ഉടമകൾക്ക് മതിയായ രേഖകൾ സമർപ്പിച്ചാൽ നികുതി ബാധ്യതയിൽ നിന്ന് ഇളവ് ലഭിക്കുന്നതാണ്. റവന്യൂ റിക്കവറി നടപടികൾ നേരിടുന്നവർക്കും നികുതിയോടൊപ്പം റവന്യു കളക്ഷൻ ചാർജ് അടച്ച് ഈ പദ്ധതിയുടെ പ്രയോജനം നേടാം.
വാഹനം നിലവിലില്ല എന്ന നിലയിൽ ഒറ്റത്തവണ തീർപ്പാക്കൽ പദ്ധതി പ്രകാരം ബാധ്യത അവസാനിപ്പിച്ച വാഹനം ഭാവിയിൽ റോഡിൽ ഉപയോഗിക്കുന്നതായി കണ്ടെത്തിയാൽ ഇളവില്ലാതെ യഥാർത്ഥ നികുതി പൂർണ്ണമായും ഒടുക്കേണ്ടിവരുന്നതാണ്.
by Midhun HP News | Oct 28, 2026 | Latest News, കേരളം
തെലുങ്ക്- ഹിന്ദി ചിത്രമായ ‘രക്ത ചരിത്ര’ത്തിലൂടെയാണ് നടി രാധിക ആപ്തെ തെന്നിന്ത്യൻ സിനിമയിൽ അരങ്ങേറ്റം കുറിക്കുന്നത്. പിന്നീട് ‘വെട്രി സെൽവൻ’, ‘കബാലി’, ‘ലയൺ’ തുടങ്ങിയ ചിത്രങ്ങളിലും രാധിക അഭിനയിച്ചിരുന്നു. ‘ചിത്തിരം പേസുതടി 2’ ആണ് രാധികയുടേതായി ഏറ്റവുമൊടുവിൽ തിയറ്ററുകളിലെത്തിയ തെന്നിന്ത്യൻ ചിത്രം.
തെന്നിന്ത്യൻ സിനിമകളിൽ നിന്ന് താൻ വിട്ടു നിൽക്കുന്നതിന്റെ കാരണം വ്യക്തമാക്കിയിരിക്കുകയാണ് രാധിക ആപ്തെ ഇപ്പോൾ. തന്റെ പുതിയ നെറ്റ്ഫ്ലിക്സ് സീരീസായ ‘അക്ക’യുടെ പ്രൊമോഷന്റെ ഭാഗമായി ന്യൂസ് 18 ന് നൽകിയ അഭിമുഖത്തിൽ സംസാരിക്കുകയായിരുന്നു രാധിക. കാഴ്ചപ്പാടുകളിലുള്ള വ്യത്യാസമാണ് ഇതിനൊരു കാരണമെന്ന് രാധിക വ്യക്തമാക്കി.
തെന്നിന്ത്യൻ സിനിമകളിൽ ഉത്തരേന്ത്യയിൽ നിന്നുള്ള നടിമാരെ അഭിനയിപ്പിക്കുന്നതിന് കാരണം അവർക്ക് കൂടുതൽ നിറമുള്ളതുകൊണ്ടാകാമെന്ന് രാധിക ആപ്തെ പറഞ്ഞു. തനിക്ക് അത്ര വെളുത്ത നിറമല്ല. ഈ പ്രവണതയെ താൻ പ്രോത്സാഹിപ്പിക്കാൻ ആഗ്രഹിക്കുന്നില്ലെന്നും നടി വ്യക്തമാക്കി.
“എന്റെ ധാരണ തെറ്റാകാം. എങ്കിലും എനിക്ക് തോന്നുന്നത്, തെന്നിന്ത്യൻ സിനിമകളിൽ ഉത്തരേന്ത്യൻ നടിമാരെ കാസ്റ്റ് ചെയ്തിരുന്നത് അവർക്ക് കൂടുതൽ നിറമുള്ളതു കൊണ്ടാണ്. എനിക്ക് വെളുത്ത നിറമല്ല. സൗത്ത് ഇന്ത്യൻ സിനിമകളിൽ എന്തുകൊണ്ട് സൗത്ത് ഇന്ത്യൻ നടിമാരെ കാസ്റ്റ് ചെയ്യാതെ ഉത്തരേന്ത്യൻ നടിമാരെ കൊണ്ടുവരുന്നു എന്നാലോചിച്ച് ഞാൻ അത്ഭുതപ്പെട്ടിട്ടുണ്ട്.
ഇവിടെ അവർക്ക് വിദേശികളെയാണ് വേണ്ടത്. നമുക്ക് ആ ഒരു പ്രവണതയുണ്ട്. ഞാൻ അതിനെ പ്രോത്സാഹിപ്പിക്കാൻ ആഗ്രഹിക്കുന്നില്ല. തെന്നിന്ത്യയിലെ സ്ത്രീകൾ സുന്ദരിമാരും പ്രതിഭാശാലികളും അതിശയകരമായ കഴിവുള്ളവരും വ്യക്തിത്വമുള്ളവരുമാണ്. അവർക്ക് ഇവിടുത്തെ ഭാഷ നന്നായി കൈകാര്യം ചെയ്യാനും അറിയാം.
അവർ മികച്ച അഭിനേത്രികളുമാണ്. മുംബൈയിൽ നിന്ന് വരുന്ന, ഇവിടുത്തെ ഭാഷ ഒട്ടും സംസാരിക്കാൻ അറിയാത്ത, മറ്റുള്ളവരെക്കൊണ്ട് ശബ്ദം ഡബ്ബ് ചെയ്യിക്കുന്ന ബോംബയിൽ നിന്നുള്ള ആളുകൾക്ക് പകരം, ഇവിടുത്തെ സ്ത്രീകൾക്ക് തന്നെ ദക്ഷിണേന്ത്യൻ സിനിമകളിൽ അവസരം കൊടുക്കണം എന്നാണ് എനിക്ക് തോന്നുന്നത്. ഇത്തരം പ്രവണതകളോട് എനിക്ക് വലിയ യോജിപ്പില്ലായിരുന്നു.
ചില പ്രത്യേക കാരണങ്ങളാൽ ഒരു പ്രത്യേക നടി തന്നെ ചെയ്യേണ്ട ഒരു വേഷമാണെങ്കിൽ എനിക്ക് അത് മനസിലാകും. എന്നാൽ ഇവിടെ ഭാഷയും എനിക്കൊരു വലിയ തടസമായി മാറി. ഒരു ഘട്ടത്തിൽ, എനിക്ക് അങ്ങനെ തോന്നിയിരുന്നില്ല, എനിക്ക് ഏത് ഭാഷയിലും അഭിനയിക്കാൻ കഴിയുമെന്ന് ഞാൻ കരുതി. അങ്ങനെ ഞാൻ ഏഴ് വ്യത്യസ്ത ഭാഷകളിൽ സിനിമകൾ ചെയ്തു.
എന്നാൽ, കേവലം ഡയലോഗുകൾ ഓർത്തു വെക്കുക എന്നത് മാത്രമാണോ അഭിനയം ?. ഡയലോഗ് മറന്നുപോകുന്ന സാഹചര്യത്തിൽ, ആ സന്ദർഭത്തിനനുസരിച്ച് എന്തെങ്കിലും ചെയ്യണമെന്നുണ്ടെങ്കിൽ, ആദ്യം ആ ഭാഷ അറിഞ്ഞിരിക്കണം. എനിക്ക് ആ ഭാഷകൾ അറിയില്ലായിരുന്നതു കൊണ്ട്, ആ സിനിമകളോട് പൂർണമായും നീതി പുലർത്താൻ എനിക്ക് കഴിയില്ലെന്ന് ഞാൻ തിരിച്ചറിഞ്ഞു.
പത്തു വർഷം മുൻപാണ് ഞാൻ അവസാനമായി ഒരു തെന്നിന്ത്യൻ സിനിമയിൽ അഭിനയിച്ചത്. അന്നവിടെ കാര്യങ്ങൾ കുറച്ചുകൂടി അനൗപചാരികമായിരുന്നു എന്നാണ് എന്റെ ഓർമ. പല കാര്യങ്ങളും സൗഹൃദത്തിന്റെ പുറത്താണ് നടന്നിരുന്നത്. അവർ വളരെ സോഫ്റ്റായിട്ടുള്ള വളരെ കരുണയുള്ള ആളുകളാണ്. ‘നിങ്ങൾ ഇപ്പോൾ ഞങ്ങളുടെ കുടുംബത്തിലെ ഒരാളെപ്പോലെയാണ്’ എന്ന് അവരെന്നോട് പറയുമായിരുന്നു.
സ്വന്തം സഹോദരിയെപ്പോലെയാണ് അവർ എന്നോട് പെരുമാറിയിരുന്നത്. അതിനർത്ഥം എനിക്ക് ചില കാര്യങ്ങൾ അവരോടുള്ള കടമയുടെ പേരിൽ ചെയ്യേണ്ടി വരും എന്നാണ്. അതൊരു പ്രശ്നമായി മാറിയേക്കാം. എങ്കിലും, അവരുടെ അടുത്ത് ചെന്ന് നിന്ന് സംസാരിക്കാൻ കഴിയുക എന്നത് നല്ലൊരു കാര്യമായിരുന്നു”.- രാധിക ആപ്തെ പറഞ്ഞു.
by Midhun HP News | Oct 28, 2026 | Latest News, കേരളം
തിരുവനന്തപുരം: ഒരിടവേളയ്ക്ക് ശേഷം സംസ്ഥാനത്ത് ചൂട് വര്‍ധിക്കാന്‍ സാധ്യത. ഞായറാഴ്ച വരെ ഒറ്റപ്പെട്ടയിടങ്ങളില്‍ താപനില സാധാരണയെക്കാള്‍ മൂന്ന് മുതല്‍ നാലു ഡിഗ്രി സെല്‍ഷ്യസ് വരെ ഉയരാന്‍ സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു. കഴിഞ്ഞ ദിവസങ്ങളില്‍ തുലാവര്‍ഷത്തിന്റെ ഭാഗമായി സംസ്ഥാനത്ത് കനത്തമഴ ലഭിച്ചിരുന്നു. എന്നാല്‍ ശക്തമായ മഴ കിട്ടി ഏതാനും ദിവസങ്ങള്‍ മാത്രം കഴിഞ്ഞപ്പോഴാണ് സംസ്ഥാനത്ത് ചൂട് കൂടുമെന്ന മുന്നറിയിപ്പ് വന്നിരിക്കുന്നത്.
ഉയര്‍ന്ന ചൂട് സൂര്യാഘാതം, സൂര്യാതപം, നിര്‍ജലീകരണം തുടങ്ങി നിരവധി ഗുരുതരമായ ആരോഗ്യപ്രശ്‌നങ്ങള്‍ക്ക് കാരണമാകും. അതിനാല്‍ പകല്‍ 11 am മുതല്‍ 3 pm വരെയുള്ള സമയത്ത് നേരിട്ട് ശരീരത്തില്‍ കൂടുതല്‍ സമയം തുടര്‍ച്ചയായി സൂര്യപ്രകാശം ഏല്‍ക്കുന്നത് ഒഴിവാക്കണമെന്നും മുന്നറിയിപ്പില്‍ പറയുന്നു.
മറ്റു ജാഗ്രതാനിര്‍ദേശങ്ങള്‍
ദാഹമില്ലെങ്കിലും വെള്ളം കുടിക്കുന്നത് തുടരുക. പരമാവധി ശുദ്ധജലം കുടിക്കുക.
നിര്‍ജലീകരണമുണ്ടാക്കുന്ന മദ്യം, കാപ്പി, ചായ, കാര്‍ബണേറ്റഡ് സോഫ്റ്റ് ഡ്രിങ്കുകള്‍ തുടങ്ങിയ പാനീയങ്ങള്‍ പകല്‍ സമയത്ത് ഒഴിവാക്കുക.
അയഞ്ഞ, ഇളം നിറത്തിലുള്ള കോട്ടണ്‍ വസ്ത്രങ്ങള്‍ ധരിക്കുക.
പുറത്തിറങ്ങുമ്പോള്‍ പാദരക്ഷകള്‍ ധരിക്കുക. കുടയോ തൊപ്പിയോ ഉപയോഗിക്കുന്നത് നല്ലതായിരിക്കും.
പഴങ്ങളും പച്ചക്കറികളും ധാരാളമായി കഴിക്കുക. ORS ലായനി, സംഭാരം തുടങ്ങിയവയുടെ ഉപയോഗം പ്രോത്സാഹിപ്പിക്കുക.
മാര്‍ക്കറ്റുകള്‍, കെട്ടിടങ്ങള്‍, മാലിന്യശേഖരണ-നിക്ഷേപ കേന്ദ്രങ്ങള്‍ (ഡംപിങ് യാര്‍ഡ്) തുടങ്ങിയ ഇടങ്ങളില്‍ തീപിടുത്തങ്ങള്‍ വര്‍ധിക്കാനും വ്യാപിക്കാനുമുള്ള സാധ്യത കൂടുതലാണ്. ഫയര്‍ ഓഡിറ്റ് നടത്തേണ്ടതും കൃത്യമായ സുരക്ഷാ മുന്‍കരുതല്‍ സ്വീകരിക്കുകയും ചെയ്യേണ്ടതാണ്. ഇവയോട് ചേര്‍ന്ന് താമസിക്കുന്നവരും സ്ഥാപനങ്ങള്‍ നടത്തുന്നവരും പ്രത്യേകം ജാഗ്രത പാലിക്കുക.
ചൂട് അധികരിക്കുന്ന സാഹചര്യത്തില്‍ കാട്ടുതീ വ്യാപിക്കാനുള്ള സാധ്യതയുണ്ട്. വനമേഖലയോട് ചേര്‍ന്ന് താമസിക്കുന്നവരും വിനോദ സഞ്ചാരികളും പ്രത്യേകം ജാഗ്രത പാലിക്കണം. കാട്ടുതീ ഉണ്ടാകാനുള്ള സാഹചര്യങ്ങള്‍ ഒഴിവാക്കണം. വനം വകുപ്പിന്റെ നിര്‍ദേശങ്ങള്‍ കര്‍ശനമായി പാലിക്കണം.
വിദ്യാഭ്യാസ സ്ഥാപനങ്ങളില്‍ വിദ്യാര്‍ഥികള്‍ക്ക് ശുദ്ധമായ കുടിവെള്ളവും ക്ലാസ്സ് മുറികളില്‍ വായു സഞ്ചാരവും ഉറപ്പാക്കേണ്ടതാണ്. പരീക്ഷാക്കാലമായാല്‍ പരീക്ഷാഹാളുകളിലും ജലലഭ്യത ഉറപ്പാക്കണം.
വിദ്യാര്‍ഥികളുടെ കാര്യത്തില്‍ സ്‌കൂള്‍ അധികൃതരും രക്ഷിതാക്കളും പ്രത്യേകശ്രദ്ധ പുലര്‍ത്തേണ്ടതാണ്. കുട്ടികള്‍ക്ക് കൂടുതല്‍ വെയിലേല്‍ക്കുന്ന അസംബ്ലികളും മറ്റ് പരിപാടികളും ഒഴിവാക്കുകയോ സമയക്രമീകരണം നടത്തുകയോ ചെയ്യേണ്ടതാണ്. കുട്ടികളെ വിനോദ സഞ്ചാരത്തിന് കൊണ്ടുപോകുന്ന സ്‌കൂളുകള്‍ 11 am മുതല്‍ 3 pm വരെ കുട്ടികള്‍ക്ക് നേരിട്ട് ചൂട് ഏല്‍ക്കുന്നില്ല എന്ന് ഉറപ്പ് വരുത്തുക.
അംഗനവാടി കുട്ടികള്‍ക്ക് ചൂട് ഏല്‍ക്കാത്ത തരത്തിലുള്ള സംവിധാനം നടപ്പാക്കാന്‍ അതാത് പഞ്ചായത്ത് അധികൃതരും അംഗനവാടി ജീവനക്കാരും പ്രത്യേകം ശ്രദ്ധിക്കണം.
കിടപ്പ് രോഗികള്‍, പ്രായമായവര്‍, ഗര്‍ഭിണികള്‍, കുട്ടികള്‍, ഭിന്നശേഷിക്കാര്‍, മറ്റ് രോഗങ്ങള്‍ മൂലമുള്ള അവശത അനുഭവിക്കുന്നവര്‍ തുടങ്ങിയ വിഭാഗങ്ങള്‍ പകല്‍ 11 മണി മുതല്‍ 3 മണി വരെ നേരിട്ട് സൂര്യപ്രകാശം ഏല്‍ക്കാതെയിരിക്കാന്‍ പ്രത്യേകം ശ്രദ്ധിക്കണം. ഇത്തരം വിഭാഗങ്ങള്‍ക്ക് എളുപ്പത്തില്‍ സൂര്യാഘാതം ഏല്‍ക്കാനുള്ള സാധ്യതയുള്ളതിനാല്‍ ഇവരുടെ കാര്യത്തില്‍ പ്രത്യേക ശ്രദ്ധ പുലര്‍ത്തേണ്ടതാണ്.
ഇരുചക്ര വാഹനങ്ങളില്‍ ഓണ്‍ലൈന്‍ ഭക്ഷണ വിതരണം നടത്തുന്നവര്‍ ഉച്ച സമയത്ത് (11 am to 3 pm) സുരക്ഷിതരാണെന്ന് അതാത് സ്ഥാപനങ്ങള്‍ ഉറപ്പുവരുത്തേണ്ടതാണ്. അവര്‍ക്കു ചൂട് ഏല്‍ക്കാതിരിക്കാന്‍ ഉതകുന്ന രീതിയിലുള്ള വസ്ത്രധാരണം നടത്താന്‍ നിര്‍ദേശം നല്‍കുകയും, അതുപോലെ, ആവശ്യമെങ്കില്‍ യാത്രക്കിടയില്‍ അല്പസമയം വിശ്രമിക്കാനുള്ള അനുവാദം നല്‍കുകയും ചെയ്യേണ്ടതാണ്.
മാധ്യമപ്രവര്‍ത്തകരും പൊലീസ് ഉദ്യോഗസ്ഥരും ഈ സമയത്ത് (11 am to 3 pm) കുടകള്‍ ഉപയോഗിക്കുകയും നേരിട്ട് വെയില്‍ ഏല്‍ക്കാതിരിക്കാന്‍ ശ്രദ്ധിക്കുകയും ചെയ്യുക. ജോലിയില്‍ ഏര്‍പ്പെട്ടിരിക്കുന്ന ഉദ്യോഗസ്ഥര്‍ക്കു കുടിവെള്ളം നല്‍കി നിര്‍ജലീകരണം തടയുവാന്‍ സഹായിക്കുക.
പൊതുപരിപാടികള്‍, സമ്മേളനങ്ങള്‍ എന്നിവ നടത്തുമ്പോള്‍ പങ്കെടുക്കുന്നവര്‍ക്ക് ആവശ്യമായ കുടിവെള്ളം, തണല്‍ എന്നിവ ലഭ്യമാണെന്ന് സംഘാടകര്‍ ഉറപ്പുവരുത്തുക. പകല്‍ 11 മുതല്‍ വൈകുന്നേരം 3 വരെ കഴിവതും സമ്മേളനങ്ങള്‍ ഒഴിവാക്കുക.
യാത്രയിലേര്‍പ്പെടുന്നവര്‍ ആവശ്യമായ വിശ്രമത്തോടെ യാത്ര തുടരുന്നതാകും നല്ലത്. വെള്ളം കയ്യില്‍ കരുതുക.
നിര്‍മാണത്തൊഴിലാളികള്‍, കര്‍ഷകത്തൊഴിലാളികള്‍, വഴിയോരക്കച്ചവടക്കാര്‍, മറ്റേതെങ്കിലും കാഠിന്യമുള്ള ജോലികളില്‍ ഏര്‍പ്പെടുന്നവര്‍ എന്നിവര്‍ ജോലി സമയം ക്രമീകരിക്കുക. ജോലിയില്‍ ആവശ്യമായ വിശ്രമം ഉറപ്പ് വരുത്തുക.
ഉച്ചവെയിലില്‍ കന്നുകാലികളെ മേയാന്‍ വിടുന്നതും മറ്റു വളര്‍ത്തുമൃഗങ്ങളെ വെയിലത്ത് കെട്ടിയിടുന്നതും ഒഴിവാക്കണം. മൃഗങ്ങള്‍ക്കും പക്ഷികള്‍ക്കും ജല ലഭ്യത ഉറപ്പാക്കുക.
കുട്ടികളെയോ വളര്‍ത്തുമൃഗങ്ങളെയോ പാര്‍ക്ക് ചെയ്ത വാഹനങ്ങളില്‍ ഇരുത്തി പോകാന്‍ പാടില്ല.
ജലം പാഴാക്കാതെ ഉപയോഗിക്കാനും മഴ ലഭിക്കുമ്പോള്‍ പരമാവധി ജലം സംഭരിക്കാനുമുള്ള നടപടികള്‍ സ്വീകരിക്കണം. നിര്‍ജലീകരണം തടയാന്‍ കുടിവെള്ളം എപ്പോഴും ഒരു ചെറിയ കുപ്പിയില്‍ കയ്യില്‍ കരുതുക.
അസ്വസ്ഥകള്‍ അനുഭവപ്പെട്ടാല്‍ ഉടനെ വിശ്രമിക്കുകയും വൈദ്യസഹായം തേടുകയും ചെയ്യുക.
by Midhun HP News | Oct 28, 2026 | Latest News, കേരളം
തൃശൂർ: മികച്ച ജോലിയും ഒപ്പം പുണ്യഭൂമിയിൽ സൗജന്യ ഉംറ നിർവ്വഹണവും വാഗ്ദാനം ചെയ്ത് ലഹരിക്കടത്ത് മാഫിയ ചതിയിൽപ്പെടുത്തിയ മലയാളി ഉൾപ്പെടെ എട്ട് ഇന്ത്യക്കാർ സൗദിയിൽ വധശിക്ഷാ ഭീഷണിയിൽ. തൃശ്ശൂർ വടക്കേക്കാട് കൊച്ചന്നൂർ സ്വദേശി ഉമർ ഷരീഫും പശ്ചിമ ബംഗാൾ സ്വദേശികളായ ഏഴ് യുവാക്കളുമാണ് ജിദ്ദ വിമാനത്താവളത്തിൽ ലഹരിമരുന്നുമായി പിടിയിലായി രണ്ടുമാസമായി ജയിലിൽ കഴിയുന്നത്.
കേസിൽ പ്രതികൾക്ക് പരമാവധി ശിക്ഷയായ വധശിക്ഷ നൽകണമെന്ന് സൗദി പബ്ലിക് പ്രോസിക്യൂഷൻ കോടതിയിൽ വാദിച്ചതോടെ ഉറ്റവരുടെ മോചനത്തിനായി എന്തുചെയ്യണമെന്നറിയാതെ തീരാക്കണ്ണീരിലാണ് ഈ നിർധന കുടുംബങ്ങൾ.
പലസ്തീനിലെയും സുഡാനിലെയും കുട്ടികൾക്ക് വിതരണം ചെയ്യാനുള്ള മധുരപലഹാരങ്ങളാണെന്ന് വിശ്വസിപ്പിച്ചാണ് തട്ടിപ്പ് സംഘം യുവാക്കളുടെ കൈവശം മയക്കുമരുന്ന് കാർഡ്ബോർഡ് പെട്ടികളിലാക്കി നൽകിയത്. തൃശ്ശൂർ കൊച്ചന്നൂർ സ്വദേശി ആഷിക് തങ്ങൾ, മലപ്പുറം സ്വദേശി അലി എന്നിവരാണ് ഈ അന്താരാഷ്ട്ര ലഹരിക്കടത്ത് റാക്കറ്റിന് പിന്നിലെന്ന് ചൂണ്ടിക്കാട്ടി ഉമർ ഷെരീഫിന്റെ ഭാര്യ ഹാജറ ആഭ്യന്തര വകുപ്പ് മന്ത്രി രമേശ് ചെന്നിത്തലയ്ക്ക് നിവേദനം നൽകി. വിദേശത്ത് മെച്ചപ്പെട്ട ജോലി വാഗ്ദാനം ചെയ്ത് തന്റെ ഭർത്താവിനെ വ്യാജ വാഗ്ദാനങ്ങളിൽ കുടുക്കി ചതിയിലൂടെ ലഹരിമരുന്ന് കാരിയറാക്കുകയായിരുന്നുവെന്നും, ഉമർ ഷെരീഫിന്റെയും ഒപ്പമുള്ള മറ്റ് നിരപരാധികളുടെയും മോചനത്തിനായി സംസ്ഥാന-കേന്ദ്ര സർക്കാരുകൾ നയതന്ത്രതലത്തിൽ ഇടപെടണമെന്നും കുടുംബം ആവശ്യപ്പെട്ടു.
രണ്ടുമാസം മുൻപാണ് സൗദി കസ്റ്റംസിന്റെയും നാർക്കോട്ടിക്സ് കൺട്രോൾ വിഭാഗത്തിന്റെയും പിടിയിലാവുന്നത്. പരിശോധനയിൽ അതീവ നിയന്ത്രിത ലഹരിമരുന്നായ പ്രെഗാബാലിൻ വൻതോതിൽ ഇവരുടെ പെട്ടികളിൽനിന്ന് കണ്ടെത്തുകയായിരുന്നു. കസ്റ്റംസ് ഉദ്യോഗസ്ഥർക്ക് മുന്നിലും അന്വേഷണ സംഘത്തിന് മുന്നിലും തങ്ങൾ നിരപരാധികളാണെന്ന് സംഘം ആവർത്തിച്ചു വ്യക്തമാക്കി.
ഇന്ത്യയിലുള്ള അലി എന്ന വ്യക്തി സൗജന്യമായി ഉംറ ചെയ്യാനുള്ള വിമാന ടിക്കറ്റും ചെലവുകളും വഹിക്കാമെന്ന് ഉറപ്പ് നൽകി ജിദ്ദയിലുള്ള മറ്റൊരാൾക്ക് കൈമാറാൻ തന്ന പെട്ടികളാണിതെന്നും, ഇതിൽ മയക്കുമരുന്നാണെന്ന് അറിയില്ലായിരുന്നുവെന്നുമാണ് ഇവർ മൊഴി നൽകിയത്. ജീവകാരുണ്യ പ്രവർത്തനങ്ങളുടെ ഭാഗമായി പലസ്തീനിലെ കുട്ടികൾക്ക് നൽകാനുള്ള മിഠായികളും മധുരപലഹാരങ്ങളുമാണെന്ന് പറഞ്ഞാണ് പെട്ടികൾ ഏൽപ്പിച്ചതെന്നും വിമാനത്താവളത്തിന് പുറത്ത് ഒരാൾ ഇത് കൈപ്പറ്റാൻ കാത്തുനിൽക്കുമെന്ന് അറിയിച്ചിരുന്നതായും ഇവർ മൊഴി നൽകി.
വസ്തുതാന്വേഷണ രേഖകൾ പ്രകാരം, കൊച്ചന്നൂർ സ്വദേശി ആഷിക് തങ്ങളാണ് അലിയുടെ നിർദ്ദേശപ്രകാരം യാത്രകൾ ക്രമീകരിച്ചത്. ഉമർ ഷരീഫിനൊപ്പം പശ്ചിമ ബംഗാളിലെ സൗത്ത് 24 പർഗാനാസ്, രാംജി ജിബോൺപൂർ തുടങ്ങിയ ഗ്രാമങ്ങളിലെത്തി മറ്റ് ഏഴ് യുവാക്കളെയും വലയിലാക്കുകയായിരുന്നു. പ്രദേശവാസിയായ ജാഹിർ ഉദ്ദീൻ എന്ന പ്രതി മുഖേനയാണ് സൗജന്യ ഭക്ഷണവും താമസവും അടക്കമുള്ള സൗജന്യ ഉംറ വാഗ്ദാനം മറ്റുള്ളവരിലേക്ക് എത്തിച്ചത്. തുടർന്ന് പാസ്‌പോർട്ടുകൾ കൈപ്പറ്റി അഞ്ച് ദിവസത്തിനകം എല്ലാവരുടെയും യാത്ര സംഘടിപ്പിക്കുകയായിരുന്നു.
സൗദി നാർക്കോട്ടിക് ആൻഡ് സൈക്കോട്രോപിക് സബ്സ്റ്റൻസസ് നിയമത്തിലെ ആർട്ടിക്കിൾ 37(1), ആർട്ടിക്കിൾ 62(2) എന്നിവ പ്രകാരം പ്രതികൾക്ക് വധശിക്ഷ (ഖത്‌ൽ തഅ്സീറൻ) വിധിക്കണമെന്നാണ് പബ്ലിക് പ്രോസിക്യൂട്ടർ കോടതിയിൽ ആവശ്യപ്പെട്ടിട്ടുള്ളത്. കൂടാതെ ലഹരിക്കടത്തിന് ഉപയോഗിച്ച ബാഗുകൾ കണ്ടുകെട്ടാനും കസ്റ്റംസ് നിയമപ്രകാരം പിടിച്ചെടുത്ത വസ്തുക്കളുടെ മൂന്നിരട്ടി തുക പിഴയായി ചുമത്താനും പ്രോസിക്യൂഷൻ ആവശ്യപ്പെട്ടു.
കേസിൽ ഉമർ ഷരീഫിന്റെ അഭിഭാഷകൻ നവാഫ് ബാ-ഖരീഷ് കുറ്റപത്രം വിശദമായി പരിശോധിച്ച് അടുത്ത സിറ്റിംഗിൽ എതിർ സത്യവാങ്മൂലം സമർപ്പിക്കാൻ സമയം തേടിയതിനെത്തുടർന്ന് കോടതി ഹർജി മാറ്റിവെച്ചു. ബംഗാളി ഭാഷ സംസാരിക്കുന്ന മറ്റ് പ്രതികൾക്കായി ഔദ്യോഗിക കോടതി പരിഭാഷകരെ നിയോഗിക്കാനും കോടതി ഉത്തരവിട്ടു. അറസ്റ്റ് ചെയ്ത ഉദ്യോഗസ്ഥരെയും സാക്ഷികളെയും അടുത്ത തവണ വിസ്തരിക്കുമെന്ന് പ്രോസിക്യൂട്ടർ അറിയിച്ചതോടെ വാദംകേൾക്കൽ മറ്റൊരു ദിവസത്തേക്ക് മാറ്റി.
by Midhun HP News | Oct 28, 2026 | Latest News, കേരളം
കൊച്ചി: കോളിളക്കം സൃഷ്ടിച്ച അരിയിൽ ഷുക്കൂർ വധക്കേസിൽ വിധി നവംബർ 12 ന് പ്രസ്താവിക്കും. കൊച്ചിയിലെ പ്രത്യേക സിബിഐ കോടതിയാണ് വിധി പറയുന്നത്. സിപിഎം നേതാക്കളായ പി ജയരാജനും ടി വി രാജേഷും ഉൾപ്പെടെയുള്ളവരാണ് കേസിലെ പ്രതികൾ. കേസിന്റെ വിചാരണ നടപടികൾ പൂർത്തിയായി.
എം എസ്എഫ് പ്രവര്‍ത്തകനായിരുന്ന അരിയില്‍ അബ്ദുള്‍ ഷുക്കൂറിനെ 2012 ഫെബ്രുവരി 20 നായിരുന്നു കൊലപ്പെടുത്തിയത്. സംഭവസമയത്ത് സിപിഎം കണ്ണൂർ ജില്ലാ സെക്രട്ടറിയായിരുന്ന പി ജയരാജന് നേരെ നടന്ന ആക്രമണത്തിന്റെ പ്രതികാരമായാണ് കൊലപാതകം നടത്തിയതെന്നാണ് സിബിഐ ആരോപിക്കുന്നത്.
കണ്ണൂർ തളിപ്പറമ്പിലെ ചുള്ളിയോട് വയലിൽ വച്ച് എംഎസ്എഫ് പ്രവർത്തകനായ ഷുക്കൂറിനെ തടഞ്ഞുവച്ച് വിചാരണ ചെയ്ത് കൊലപ്പെടുത്തി എന്നാണ് കേസ്. നേതാക്കൾക്കെതിരേ ഗൂഢാലോചനക്കുറ്റമാണ് ചുമത്തിയിരിക്കുന്നത്. വിചാരണ കാലയളവിനിടെ രണ്ട് പ്രതികൾ മരണപ്പെട്ടു.
33 പ്രതികളുള്ള കേസില്‍ പി ജയരാജൻ 32-ാം പ്രതിയും, ടി വി രാജേഷ് 33-ാം പ്രതിയുമാണ്. സഹകരണ ആശുപത്രിയിൽ വെച്ച് പി ജയരാജനും ടി വി രാജേഷും അടക്കമുള്ള നേതാക്കൾ ഗൂഢാലോചന നടത്തിയാണ് കൊലപാതകം ആസൂത്രണം ചെയ്തതെന്ന് സിബിഐ കുറ്റപത്രത്തിൽ പറയുന്നു.
Recent Comments