by Midhun HP News | Jun 4, 2022 | Uncategorized
ലക്നൗ: പെൺകുട്ടികൾക്ക് ജന്മം നൽകിയതിന്റെ പേരിൽ യുവതിയെ ക്രൂരമായി മർദിച്ച് ഭർത്താവും ഭർതൃസഹോദരിമാരും. യുപിയിലെ മഹോബാ ജില്ലയിലാണ് സംഭവം. യുവതിയെ ഭർതൃസഹോദരിമാർ മർദിക്കുന്നതിന്റെ സിസിടിവി ദൃശ്യങ്ങൾ പുറത്തുവന്നു.
യുവതിയുടെ ആദ്യത്തെ രണ്ട് മക്കളും പെണ്കുട്ടികളാണ്. ആണ്കുഞ്ഞിന് ജന്മം നല്കിയില്ലെന്ന് മര്ദനത്തിനിടെ ഇടയ്ക്കിടെ ഇവര് പറയുന്നുണ്ട്. യുവതിയെ ആശുപത്രിയിൽ പ്രവേശിപ്പിച്ചു.യുവതിയെ അസഭ്യം പറഞ്ഞുകൊണ്ടാണ് മര്ദനത്തിന് ഇരയാക്കിയത്. ഭര്തൃവീട്ടുകാര് തന്റെ സ്വകാര്യഭാഗങ്ങളിലടക്കം ക്രൂരമായി മര്ദിച്ചുവെന്നാണ് പരാതിയില് യുവതി ആരോപിക്കുന്നത്. പൊലീസ് കേസെടുത്ത് അന്വേഷണം ആരംഭിച്ചു.
by liji HP News | Jun 3, 2022 | Uncategorized
ബെംഗളൂരു: പരിസ്ഥിതിക്കു കോട്ടം വരുത്തുകയും നാട്ടുകാർക്ക് ആരോഗ്യപ്രശ്നങ്ങളുണ്ടാക്കുകയും ചെയ്ത കേസിൽ അദാനി ഗ്രൂപ്പിന്റെ ഉഡുപ്പി പവർ കോർപറേഷൻ ലിമിറ്റഡ് (യുപിസിഎൽ) താപവൈദ്യുതി പ്ലാന്റിന് ദേശീയ ഹരിത ട്രൈബ്യൂണൽ 52 കോടി രൂപ പിഴ ചുമത്തി. ഇതിൽ പകുതി പ്ലാന്റിനു ചുറ്റുമുള്ള ശുദ്ധജല വിതരണം. മലിനജല ശുദ്ധീകരണ പ്ലാന്റുകൾ, ആരോഗ്യപരിപാലന സംവിധാനങ്ങൾ തുടങ്ങിയവ മെച്ചപ്പെടുത്താനായി വിനിയോഗിക്കണം.
ഇടക്കാല വിധിയെ തുടർന്ന് നേരത്തേ കെട്ടിവച്ച 5 കോടിക്കു പുറമേയുള്ള തുക 3 മാസത്തിനകം അടയ്ക്കണം. 10 കിലോമീറ്റർ ചുറ്റളവിലെ കൃഷിയിടങ്ങളെ പ്ലാന്റിന്റെ പ്രവർത്തനം എങ്ങനെ ബാധിക്കുന്നു എന്നു പഠിക്കാനായി പ്രത്യേക സമിതിയെയും ട്രൈബ്യൂണൽ നിയോഗിച്ചു. ഉഡുപ്പി യെല്ലൂരിലാണ് 600 മെഗാവാട്ട് ഉൽപാദന ശേഷിയുള്ള 2 പ്ലാന്റുകൾ ഉള്ളത്.
by liji HP News | Jun 3, 2022 | Uncategorized
കറുകച്ചാൽ: റബറിന്റെ ആഭ്യന്തര ഉപയോഗത്തിലും ഉൽപാദനത്തിലും വർധന. 2020–21 സാമ്പത്തിക വർഷം 7,15,000 മെട്രിക് ടണ്ണായിരുന്ന ഉപയോഗം 2021–22ൽ 7,75,000 മെട്രിക് ടണ്ണായി വർധിച്ചു.
ആഭ്യന്തര റബർ ഉൽപാദനത്തിലും വർധന ഉണ്ടായി. കഴിഞ്ഞ സീസണിൽ 10,96,000 ടൺ റബർ ഉൽപാദനം നടന്നപ്പോൾ ഇത്തവണ 12,38,000 ടണ്ണായി വർധിച്ചു.
കഴിഞ്ഞ സീസൺ അപേക്ഷിച്ച് ഇറക്കുമതിയിലും വർധനയുണ്ടായി. 2020–21ൽ 4,10,478 ടൺ റബർ ഇറക്കുമതി ചെയ്തപ്പോൾ 2021–22 സീസണിൽ 5,46,369 ടണ്ണാണ് ഇറക്കുമതി.
കഴിഞ്ഞ ഏപ്രിലിൽ മുൻവർഷത്തെ അപേക്ഷിച്ച് ഇറക്കുമതി കുറവായിരുന്നെങ്കിലും മേയ് മാസത്തിൽ ഇറക്കുമതി കൂടി. ഏപ്രിലിൽ 39,105 മെട്രിക് ടൺ ഇറക്കുമതി നടന്നപ്പോൾ മേയിൽ 34,000 ടണ്ണായി കൂടി. മുൻവർഷം ഇത് യഥാക്രമം 46,444 ടണ്ണും 29,153 ടണ്ണുമായിരുന്നു.
ഷീറ്റ് റബർ ആർഎസ്എസ് 4ന് 174 രൂപയാണു നിലവിലെ വില. ടയർ കമ്പനികൾ നാട്ടിൽനിന്നു റബർ വാങ്ങുന്നതുമൂലം വില ഉയരുമെന്നാണു പ്രതീക്ഷ.
by liji HP News | Jun 3, 2022 | Uncategorized
ബെംഗളൂരു: കർണാടകയിലെ കൽബുർഗി ജില്ലയിലെ കമലാപുരയിൽ ബസും മിനിലോറിയും കൂട്ടിയിടിച്ചുണ്ടായ അപകടത്തിൽ 7 പേർ വെന്തുമരിച്ചു. വെള്ളിയാഴ്ച പുലർച്ചെയാണ് അപകടം ഉണ്ടായത്. ഡീസൽ ടാങ്കിലെ ചോർച്ചയെ തുടർന്ന് ബസിന് തീപിടിക്കുകയായിരുന്നുവെന്നാണ് പ്രാഥമിക നിഗമനം. 29 പേരാണ് ബസിൽ ഉണ്ടായിരുന്നത്. 22 പേർ രക്ഷപ്പെട്ടതായി പൊലീസ് അറിയിച്ചു. ഗോവയിൽ നിന്ന് ഹൈദരാബാദിലേക്കു പോയവരാണ് അപകടത്തിൽ പെട്ടതെന്നാണ് വിവരം. ബസ് പൂർണമായും കത്തിനശിച്ചു.
by liji HP News | Jun 2, 2022 | Uncategorized
മലപ്പുറം: ഭക്ഷ്യവിഷബാധയേറ്റെന്ന് ആരോപിച്ച് ഹോട്ടലുടമയിൽ നിന്ന് നഷ്ടപരിഹാരമായി പണം ആവശ്യപ്പെട്ട അഞ്ച് പേർ അറസ്റ്റിൽ. മലപ്പുറം ജില്ലയിലെ വേങ്ങരയിലാണ് സംഭവം. പൂച്ചോലമാട് സ്വദേശികളായ ഇബ്രാഹിം, അബ്ദുറഹ്മാന്, റമീസ്, സുധീഷ്, താട്ടയില് നാസിം എന്നിവരെയാണ് വേങ്ങര പൊലീസ് പിടികൂടിയത്. ഭക്ഷ്യവിഷബാധയേറ്റ് ആശുപത്രിയിൽ ചികിത്സയ്ക്ക് അഡ്മിറ്റായെന്ന് പറഞ്ഞാണ് ഇവർ ഹോട്ടലുടമയോട് പണം ചോദിച്ചത്. 40000 രൂപയാണ് പ്രതികൾ ആവശ്യപ്പെട്ടത്.
കഴിഞ്ഞ ദിവസം ഇവിടെ നിന്ന് ഇവർ ഭക്ഷണം കഴിച്ചിരുന്നു. ബ്രോസ്റ്റഡ് ചിക്കൻ ആണ് കഴിച്ചത്. ബാക്കി വന്ന ഭാഗം ഇവർ പാഴ്സലായി കൊണ്ടുപോയി. പിന്നീടാണ് സംഭവങ്ങളുടെ തുടക്കം. ഹോട്ടലുടമയെ വിളിച്ച ശേഷം തങ്ങൾക്ക് ഭക്ഷ്യവിഷബാധയേറ്റെന്നും ചികിത്സയിലാണെന്നും അറിയിച്ചു. പരാതി നൽകാതിരിക്കാൻ 40000 രൂപയാണ് ആദ്യം ആവശ്യപ്പെട്ടത്. പിന്നീടിത് 25000 രൂപയിലേക്ക് കുറച്ചു. എന്നാൽ ഹോട്ടലുടമ പണം നൽകാൻ തയ്യാറായില്ല. ഇദ്ദേഹം വിവരം പൊലീസിൽ അറിയിച്ചു. ഇതോടെയാണ് അഞ്ചംഗ സംഘം കുടുങ്ങിയത്. ഇവർ നേരത്തെയും സമാന കുറ്റകൃത്യം ചെയ്തതായാണ് പൊലീസ് നൽകുന്ന വിവരം.
by liji HP News | Jun 1, 2022 | Uncategorized
ആറ്റിങ്ങൽ രാമച്ചംവിള ഗവഃ എൽ.പി.എസിൽ പ്രവേശനോത്സവം. പി.ടി.എ പ്രസിഡന്റ് സുനിലിന്റെ അധ്യക്ഷതയിൽ വാർഡ് കൗൺസിലർ സുനിലിന്റേയും സീനിയർ ടീച്ചർ സോണിയയുടെയും മറ്റ് അധ്യാപകരുടെയും സാന്നിധ്യത്തിൽ നഗരസഭാ വൈസ് ചെയര്മാന് ജി തുളസീധരന്പിള്ള ഉദ്ഘാടനം നിർവഹിച്ചു.
Recent Comments